Okurugiirira ahari Basigirenda, abakwatsirwe babaire baherize kutema emiti 6 y’ekika ekya mahogany. Photo by Yosam Gucwaki.

N’ebya Yosam Gucwaki

MASINDI

Abakuru kuruga omu kitongore ekirikujunanizibwa aha kurinda ebibira omu ihanga ekya National Forestry Authority (NFA) bakwataniise n’amahe ga UPDF na Pooriisi ya Uganda aharwamukaaga bakwatsire abantu 4 abarikugambwa kuba bashazire embaaho omu kibira kya Budongo omu disiturikiti ya Masindi omu bushobya.

Francis Olugu, Omuhwezi wa kamishana wa Pooriisi obaire naduumira ekikwekweto eki agambire abakwatsirwe nka; James Bossa, 47, Charles Ofonde, 31, Joseph Okoru, 52, na Asil Onenican, 50, boona abatuura b’omukyaro ekya Kapeeka III omu tauni kanso ya Kabango omuri Masindi.

Banyakuteekateekwaho n'ebizibiti byabo aha ofiisi z'ekitongor kya NFA omuri Masindi. Photo By Yosam Gucwaki

Banyakuteekateekwaho batwirwe aha Pooriisi ya NFA omuri Masindi n’ebikwato byabo ebi barikugambwa kuba babaire nibakoresa.

Olugu naagira ngu abantu 4 abakwatsirwe nibaija kuteebwaho omushango gw’okutaahirira ekibira kya Budongo ekirikuhenda ekiragiro ky’ebibira ekya 2003 akacweka aka 14.

Boaz Basigirenda, orikureberera ekibira kya Budongo naagira ngu nibakwata abantu aba barikuhwerwaho abatuura hamwe n’abakuru omu kitongore ky’ebibira ekya NFA, ab’eby’okwerinda n’abandi abarikukwatwaho n’ekigyendererwa ky’okurinda ekibira eki.

Boaz Basigirenda, nabwo arabwire abashuubuzi okurekyeraho omuze gw’okutuma abantu kuza kutema emiti omu bibira arikwongyeraho ngu nabo nibaija kukwatwa.

Okurugiirira ahari Basigirenda, abakwatsirwe babaire baherize kutema emiti 6 y’ekika ekya mahogany. 

"Babaire bombekire akaju ka tenti omu kibira ahi babaire nibabiika ebintu byabp. Wiiki erikwija, nitwija kukora ebikwekweto nk’ebi omu bibira 43 ebiri omu kyanga kya Bunyoro,” Basigirenda arikushoborora.

Basigirenda nabwo arabwire abashuubuzi okurekyeraho omuze gw’okutuma abantu kuza kutema emiti omu bibira arikwongyeraho ngu nabo nibaija kukwatwa.

Ahitwaza kuhandikira amakuru aga, abakwatsirwe babaire bakiri aha kitebe kikuru ky’ekitongore ky’ebibira ekya NFA omuri Bugolobi obwo okucondooza kurikugumizamu.

#WestUpdates