Bataano bakwateirwe okwita ow’emyaka 18 omuri Buhweju.

N’ebya Omushaki weitu

BUHWEJU

Pooriisi omu disiturikiti eya Buhweju ekwatsire abantu 5 ahabw’okugira akakwate n’okwitwa kw’omwojo w’emyaka 18.

Martial Tumusiime, Omugambirizi wa Pooriisi ahabw’ekyanga ekya Bushenyi empango, naagira ngu omugyenzi omanyirweho erya Alex ryonka, 18, agizire obuteikirizana n’abantu omu baara kandi akwatsire amabaare yatandika kugabateera.

Tumusiime nayongyeraho ngu rimwe aha mabaare riteire omukazi ou omushaija we ayetsire abantu abairukangire ahari Alex bakamukwata bakamuteera mpaka bamwitsire.

Ekikorwa ky’obwinazi eki kibaire omu kyaro kya Kyanika ‘A’ omu tauni kanso ya Nyakaziba omu disiturikiti ya Buhweju.

Tumusiime nayongyeraho ngu banyakukwatwa nibagambwa kuba bakwatsire omutumbi gw’omugyenzi bakagunaga omu kidiba omu kyaro ekya Karengyezo.

#WestUpdates
#RadioWestAt25