Kooti eragiire okukwatwa kw’omuny’eishengyero Mwijukye

N’ebya Bruno Mugizi

Buhweju:

Omuramuzi wa kooti y’eidaara ry’okubanza ahabwa disiturikiti ya Buhweju ahandiikire arikuragiira okukwatwa kw’omuny’eishengyero w’eishaaza rya Buhweju, Mwijukye Francis.

Mwijukye, orikujunaanwa okuhemba omuriro omubantu abaire ari ow’okureebeka omu kooti nyomwabazyo aharwakabiri, 6/8/2024 beitu tareebekireho kwehozaho.

Eki kigyemesereize Omuramuzi Daniel Kavuma kuragiira pooriisi kukwata Mwijukye kandi kumureeta omu kooti ahabiro 14/8/2024 bwanyima y’okujeemera okwetwa kwa kooti.

Kurugiirira ahampababa, Mwijukye obu yabaire ari omukyaro ekya Rwanyambare, egomborora eya Nyakishana omu disiturikiti ya Buhweju ahabiro 12/5/2024, akatwara abaikiriza ahakereziya eya Rwanyambare nikwo kutaahirira amaka ga Frank Kamugisha bakashiisha ebintu bye.

Kamugisha najunaanwa okwiba eitaka ry’ekereziya.

Nuwagaba Moses, puriida wa Mwijukye amanyise kooti ngu Mwijukye taraheibwe emishango ei arikujunaanwa nikyo atareebekireho omu kooti kwehozaho.

Beitu hoona orubaju oruhakani rugambire kooti ngu bakamuha ekihandiiko kirikworeka emishango ei arikujunaanwa obwo barikurabira omu Karaani wa Paramenti.

Kavuma naagira ngu puriida wa Mwijukye agambire kooti ngu amushabire kumujwekyera omu kooti ahabw’okuba abaire agiire omu eirwariro erya Agha Khan omuri Kenya kukyeberwa, ekirikworeka ngu Mwijukye abaire namanya okuhurira omushango ogu.

#WestUpdates