Aha kutandika kw’okwezi oku, kooti ya Buhweju ekataho ekibaruha kya munkwatire ahari MP Mwijukye bwanyima y’okuremwa kuza omu kooti kuhurira emishango ei abaire najunaanwa. Radio West Photo.

N’ebya Beth Akatukunda

BUHWEJU

Ofiisi y’omutonganirizi mukuru wa gavumenti eya DPP eyihireho emishango y’okuhemba omuriro omu bantu ebaire nejunaanwa Omuny’ishengyero w’eishaza rya Buhweju omu disiturikiti eya Buhweju, Francis Mwijukye.

Aha kutandika kw’okwezi oku, kooti ya Buhweju ekataho ekibaruha kya munkwatire ahari MP Mwijukye bwanyima y’okuremwa kuza omu kooti kuhurira emishango ei abaire najunaanwa.

Abahababi babaire nibajunaana Mwijukye okwebembera guruupu y’abakaturikiti b’ekereziya ya Rwanyamabare omu gomborora eya Nyakishana bakataahirira amaka ga Fred Kamugisha batyo bakashisha ebintu bye.

Obwa hati, Mwijukye nagambira Radio West ngu okumwihaho emishango n’akamanyiso akarikworekyera kimwe ebishuba ebi abamutaabariize bamuteireho omu mushango ogu, ebi yabaire yagambiireho omutonganirizi mukuru wa gavumenti.
 
Mwijukye nabwo araganiise kurwanirira abandi abu abaire najunaanwa nabo omu mushango ogu abarimu abeebembezi b’ekicweka ekyo hamwe n’aba kirinju b’omu disiturikiti okureeba ngu nabyo emishango yabihwaho.

#WestUpdates