Omukoro gw’okujaguza emyaka 50 ya disiturikiti ya Bushenyi nigwija kubaho ebiro 04.07.2024 . PHOTO by Bruno Mugizi.

N’ebya Bruno Mugizi

BUSHENYI

Abeebembezi omu disiturikiti ya Bushenyi batongoize okujaguza emyaka 50 kuruga baheebwa disiturikiti obwo barikugishara ahari Mbarara omu mwaka gwa 1974.

Omukoro gw’okutongoza enteekateeka egi gwaba ahari Peak Hotel omu tauni ya Bushenyi kandi gwaba gukurirwe ceeyamaani w’entebe ya kataano, Jaffar Basajjabalaba, RDC wa Bushenyi-Robert Atuhairwe hamwe na guruupu ya Make Bushenyi Great Again abeebembirwe Dr.Muramuzi Innocent.

Omukoro gw’okujaguza emyaka 50 ya disiturikiti ya Bushenyi nigwija kubaho ebiro 04.07.2024 aha kishaayi kya Bushenyi.

Okurugiirira ahari Jaffar Basajjabalaba, omukoro ogu gugyenderire kugaruzaho eby’obuhangwa, okumanyana n’okworeka abantu ebi Bushenyi ebaasize kukora omu myaka 50 kuruga etunga disiturikiti kuruga ahari Mbarara.

Dr. Innocent Muramuzi owa 'Make Bushenyi Great Again' nagira ngu baheerize kumanyisa za disiturikiti ezayihirwe ahari Bushenyi nka Sheema, Buhweju, Mitooma, Rubirizi na Ntungamo kandi nabo bahamize kwejumbira aha mukoro ogu.

Omugyenyi mukuru nateekateekwa kuba mukuru w’eihanga. Yoweri Kaguta Museveni.

#WestUpdates