Sipiika Among n’abandi bacurira owabaireho MP, Gonahasa

Sipiika Among n’abandi bacurira owabaireho MP, Gonahasa

N’ebya Ivan Tsebeni

Sipiika w’eishengyero, Anita Among yacurira owabaireho omuny’eishengyero w’ishaaza rya Kabweri, Francis Gonahasa owaafa akasheeshe aka. 

Among arikuraabira aha Twitter yaagira ngu yashaasha n’okufa kwa Hon. Gonahasa kandi yahitsya okushaasha kwe ah’abeeka ye n’eishengyero.

Among yagamba ahari Gonahasa nk’omuny’eishengyero owabaire ayehaireyo kandi obweebembezi bwe nibwija kuguma nibwijukwa.

Abeeka baagira ngu yaafa akasheeshe k’eriizooba.

Hon. Francis Mwijukye, omuny’eishengyero wa Buhweju naawe yaashaasha n’okufa kwa Gonahasa. Yamugambaho nk’owubatahire omu eishengyero hamwe omwebeembezi murungi wa FDC ou eiraaka rye ryabaire nirihururwa omu eishengyero 

Francis Gonahasa, obaire ari memba w’ekibiina ekya FDC, akakora nka shadow minisita w’eby’obuhingi n’oburiisa omu eishengyero erya 11.

Akaija yaasingwa Stephen Mugole, ow’ekibiina ekya NRM omu karuuru ak’omwaka 2021.

Ogu yatsigaho omukazi omwe, Jolly Gonahasa n’abaana 4.

#WestUpdates