Tumusiime naagira ngu ekiretsireho butandu egi n’okuvugisa ekimama.

N’ebya Bruno Mugizi. 

BUSHENYI

Abantu 4 bahamiibwa kuba nibo bafeereire omuri butandu ebaire omu kyaro kya Omukatagu omugomborora eya Ibaara omu disiturikiti eya Bushenyi aharuguuto orwa Ishaka-Kagamba.

Pooriisi neegira ngu abantu 33 abatakamanyirwe maziina nibo bairukangiziibwe ah’eirwariro erya Kitagata General Hospital omu disiturikiti ya Sheema bari omumbeera mbi bwanyima ya butandu egi kubaho.

Omugambirizi wa Pooriisi ahabwa Bushenyi empango, Martial Tumusiime naagira ngu butandu egi ebaireho shaaha nka 1:50 z’omwebazyo gw’orwakana ebiro 13.02.2025.

Naagira ngu emotoka ya FUSO ehandiikirwe omunamba ya UAX 019K FUSO ebaire eriho abantu 37 b’enyikiriza y’obumwe ey’Owobusobozi Bisaka omu kyaro ekya Kapyemi omu disiturikiti eya Kagadi babaire nibaza Kisoro kushaba.

Tumusiime naagira ngu emotoka egi ei abanti aba babaire nibatamburiramu erugire aharuguuto nikwo kuteera ‘pavement’ ekekunamuura emirundi mingi, abantu 4 bakafeeraho.

Okurugiirira ahari Pooriisi, abagyenzi tibakamanyirwe ebirikubakwataho beitu barimu omushaija omwe n’abakazi 3 abafeeriireho.

Tumusiime naagira ngu ekiretsireho butandu egi n’okuvugisa ekimama.

Emitumbi y’abagyenzi etwirwe omu kabafu ah’eirwariro erya Kitagata kukyeberwa.

#WestUpdates