Abarikuteekateekwaho barimu: Kanzira John, 25 na Dan Agaba, 28 boona abatuura b’omu kyaro kya Katete omu rurembo rwa Mbarara. Photos by Bruno Mugizi.

N’ebya Bruno Mugizi

SHEEMA

Pooriisi omu disiturikiti eya Sheema yacungura abarikuteekateekwaho okuba abashuma b’ente kuruga aha kikunga musisa ky’abantu abaaba baine ekiniga kingi nk’enjoki z’ekyanda bwanyima y’obushuma bw’amatungo kweyongyera omuri Sheema.

Abarikuteekateekwaho abarimu: Kanzira John, 25 na Dan Agaba, 28 boona abatuura b’omu kyaro kya Katete omu rurembo rwa Mbarara nibajunaanwa okwejumbira omubushuma bw’amatungo omu kyanga eki.

Okurugiirira ahari ASP Consilata Kasule, Omuduumizi wa Pooriisi ahabwa Sheema omukiro ky’ebiro 09.12.2024, emotoka ey’ekika kya Corona eyanamba UAG 468T eteekateekirweho kuba netambuza ente kandi abatuura ku bagireebire bayerundaana bagikwatira omu tauni ya Kabwohe omuri Sheema Munisiparite. 

Emotoka ei abarikuteekateekwaho kuba abashuma b'amatungo babaire nibavuga ekwateirwe omuri Kabwohe, Sheema.

Ku bagiire kucaaka emotoka egyo bagishangiremu entunduubaare ebaireho eriho amasha g’ente garimu eshagama, emihoro 2 hamwe n’ebinono by’ente ekireteire bateekateeka ngu ababiri aba babaasa kuba bari abashuma.

Pooriisi ebaasize kucungura ababiri aba kubiiha ahabatuura ababaire nibenda kubiita nikwo kubatwara omu kihome kya Pooriisi ya Kabwohe kubiguraho omushango obwo okucondooza omunshonga egi kurikugyenda omu maisho.

Omwe ahabarikuteekateekwaho kuba abashuma b'amatungo abakwateirwe omuri Sheema arikworeka oku abatuura bamuteire akatunga obuhuta omu mutwe.

Kubabuziibwe ahanshonga egi, ababiri baikiriize kuba baibire ente omuri Buteraniro omu disiturikiti eya Rwampara nikwo kugiguza omu tauni ya Butare omu disiturikiti eya Bushenyi.

Obuhingwireho, emishango nyingi ey’obushuma bw’amatungo niyo ehababirwe omuri n’ente 6 eziibirwe omu divijoni ya Kashozi hamwe n’ente 2 eziibirwe omuri Sheema Central Divijoni.

#WestUpdates