AI Generated Image

N’ebya Edward Anyoli

Omushango ogu owaabeire ari diisi Abert Matsiko Mutungwire n’omukungu w’eby’obuhangwa oby’obuguzi, Tom Nuwagira, abaabeire bateirweho ogw’okuhaanisa ekibira eki n’eitaka ry’omuntu buntu.

Abatonganirizi ba Gavumenti Gertrude na Safina Bireke kuruga omu ofiisi ya mukuru w'abahababi ba Gavumenti bakingire omushango bwanyima y’abahi b’obujurizi 10 kuha obujurizi omumushango ogubeire gurimu Abert Matsiko Mutungwire na Tom Nuwagira.

Aba bari omumushango gw’okukoresa kubi ofiisi zaabo omukashonshorekye ka 11 k’ekiragiro ekirikurwanisa enguzi eky’omwaka 2009 okukwatiraine n’okuhaanisa eitaka ry’ekibira ekya Ibanda Forest Reserve eitaka ry’abeeteeraine erya Rukokoma Farmers’ Co-operative Society.

Ebiro 09.05.2024, ba kitabaaza bamanyeise kooti, eya Nakasero omuri Kampala, ekuriirwe Justice Jane Okuo Kajuga, ngu tibaraagarukye kweta abandi bahi b’obujurizi boona.

Omuramuzi Okuo niho arugiireyo akaragiira ba kitabaaza n’abarikwetonganaho kuhayo ebihandiiko omu bwire bwa wiiki 2 zonka, birikushoboorora yaaba ba kitabaarizibwa baine omushango gw’okwehozaho ninga batagwine. Omushango nikwo gwongyeirweyo gutyo kuhisya ebiro 30.05.2024.

Ba kitabaaza nibagira ngu Mutungwire na Nuwagira, obu baabeire nibaakikora aha disiturikiti y’Ibanda, bakakoresa kubi obushoboorozi obwabeire bubahairwe emirimo yaabo. Nibabatura okutaaha omunadagaano y’okwikirizagana eya

Rukokoma Mixed Farmers’ Cooperative Society, bakahaanisa ekicweka ky’ekibira kya Ibanda Forest Reserve n’eitaka erindi.

Ba kitabaaza nibagamba ngu abateirweho orubanja bakaikiriza kuhayo ‘hectares’ 50 z’ekibira barikuzihaanisamu ‘hectares’ 50 Rukokoma Mixed Farmers’ Cooperative Society, betaine bushoboorozi obushororongokire gye.

Nikyongyera kigambwa ngu omugwa 2009 omukwezi kwa 6, Mutungwire n’abandi bakataaha omukwikirizagana okwakozirwe betaine rusa rw’okuhayo ekicweka ky’eitaka ry’ekibira.

Ba kitabaarizibwa beehakaine orubanja kandi barekwirwe ahamusingo

#WestUpdates