Minisita Godfrey Kabbyanga

N’ebya Samuel Amanyire 
Kasese 

Abeebembezi b’amadiini omu disiturikiti ya Kasese bahigirwe kubuururira akugaigahara n’entunguuka y’entuura omubwire bw’okuha abaikiriza emishororongo n’emboozi z’omu Baiburi na za Koraani.

Minisita w’ebya za kanyabwengye n’okuhabura eihanga, Godfrey Kabbyanga, ebi abigambire aharwa mukaaga ebiro 10.08.2024 ahakukingaho ekiteerane ky’abacwanga ekimazire ebiro 9 ahakanisa ya Kanyampara omuri Bukonzo East kandi ekihikirweho abantu barikurenga 2,000 omu disiturikiti ya Kasese.

Kabbyanga agizire ngu ti ky’oburingaaniza kandi tikiine mugasho kurindira abantu omumwanya gumwe kumara ebiro 9 batarikuheebwa butumwa bw’okubahabura ahaku barikubaasa kukora n’amaani, bakeejumba omu puroguraamu ezirikubareetera entaasya kandi bakaakiira puroguraamu za Gavumenti kubinga obworo omumaka gaabo.

“Eki nikigamba ahabw’okugira ngu ow’ishemwe ashemereirwe kandi orikutaasya naija kubaasa kushagika entunguuka z’ekanisa,” Kabbyanga nikwo agizire.

Ahabw’okugira ngu empaka z’omupiira gw’ebigyere omuri Bungyereza eza English Premier League, Minisita Kabbyanga ayongyeire yaahiga eminyeto kurekyer’aho kusiisira obwire barikuteera empaka aha tiimu z’abajungu beitu bejumbe omubigaaniiro by’entunguuka kandi bahajaane n’ahantebeekanisa n’emiringo y’okuta ebiteekateeko ebi omunkora.

“Noomara obwire bwona orikugamba ahari Andre Onana owa Manchester United na Bukayo Saka owa Arsenal  otarikumanya ngu nibatunga omushaara gurengire shiringi 200,000,000 buri wiiki,” Minisita Kabbyanga.

Nka Gavumenti, tukozire omurimo gwaitu kubashagika turikurabira omu Parish Development Model hamwe na Emyoga. Ogwanyu n’okukoresa kurungi sente ezo mukatunga entaasya ya buriizooba,” nikwo ayongyeireho atyo.

Beitu hoona Pastor Doctor Moses Maka Ndimukika, Ish’abareeberezi w’ekanisa y’abacwanga agizire ngu ekigyendererwa kyabo eky’obwire buraingwa n’okuhiga abantu baabo kukora n’amaani,  bakashomesa abaana baabo kandi bakareebeka ngu amagara gaabo gari omumbeera nungi.

Minisita w’eby’obushuubuzi, Gen. Wilson Mbasu Mbadi obaire ari omugyenyi mukuru ahigire abantu kwinegyeza obusingye, obumwe, hamwe n’obutuura gye kandi bakashagikana kutunguuka.

Mbadi ayongyeire yaashaba kushagika Gavumenti n’omutima gumwe kubaasa kugiganyirwamu.

“Hatiriho busingye tihaine ekirikubaasa kukorwa,” nikwo agizire. 

#WestUpdates