Martial Tumusiime, Omugambirizi wa Pooriisi ahabw'ekyanga ekya Bushenyi empango. Photo by Bruno Mugizi.

N’ebya Bruno Mugizi

Pooriisi omu disiturikiti ya Sheema eriyo nehiiga omushaija orikugambwa kuba aitsire omushaija w’emyaka 21.

Omugambirizi wa pooriisi ahabw’ekyanga ekya Bushenyi empango yaahamya ekikorwa ky’obwitsi eki ekibaireho nka shaaha 4 z’ekiro kya nyomwabazyo omukyaro kya Rwanyinakahire omu Munisiparite ya Sheema.

Orikuteekateekwaho ni Vincent Beinomugisha, 21, makanika kandi omutuura w’ekyaro kimwe orikugambwa kuba acumitsire Aineruhanga Jackson, 21 n’ekiti akamwita.

Nikigambwa ngu omwabazyo gwa Sunday, 3/9/2023, ababiri aba baagiizire obuteikirizana omu kibanda kya firimu obu babaire nibareeba omupiira gwa Arsenal na Manchester United.

Bwanyima y’omupiira kuhwa, ababiri aba bagiire omubaara ya Coleb Akanyijuka, obabingire ahabw’okuba babaire nibatongana.

Nabwanyima, Vincent airukangize Jackson nikwo kumucumita n’ekiti omu kifuba akafeeraho.

Kurugiirira ahari Martial, pooriisi ehikire ahamwanya ogu kandi etungirs ekiri kiine eshagama kukora nk’ekizibiti.

Omubiri gwa Jackson gwatwarwa ah’erwariro erya Kabwohe HCIV kukyeberwa obwo okucondooza kurikugumizamu.

#WestUpdates