Eryato erya MV Nodl ryahika buhooro omuri Nakiwogo

Eryato erya MV Nodl ryahika buhooro omuri Nakiwogo

N’ebya Charles Etukuri 

Eryato erya MV Nodl-Victoria eryaba ririmu abashaabazi n’ebintu kuruga Bukakata Masaka ryahika gye ahamwaro gwa Nakiwogo Entebbe oihireho oku abantu oku baaba beerarikiriire.

Omuhwezi w’omugambirizi wa pooriisi ya Kampala, Luke Owoyesigyire yaagira ngu eryato ryateganisibwa omuyaga n’ebingonzi ahanyanja ya Victoria nikwo abantu kwerarikirira bakatandika kukwata obutambi. Beitu hoona eryato eri ryahika buhooro ahamwaro gwa Nakiwogo kandi abashaabazi boona bari gye.

Susan Kataike, Omugambirizi wa Minisiture y’eby’entambura yaagira ngu batunga amakuru g’eryato erya MV Nodl kuteganisibwa beitu baarahuka kwoherezayo eryato erindi erya MV Brovad eryatwara abashaabazi.

Ogu yakyoreka ngu omumeezi ag’okwakana, Okwakatano n’Okwamukaaga, enyanja ya Victoria neteganisibwa ebingonzi by’amaani. Hoona yaagira ngu abayerarikirira gwaba guri omurundi gwabo gw’okubanza kutamburira ahamaizi.
Sadala Musoke, orikukurira amato aga MV Kalangala na MV Nodl yaahamya ngu amato gombi gaahika buhooro ahamwaro.

Gavumenti ekataho amato aga MV Nodl na MV Kalangala nk’omuhanda ogundi kuza omukyanga ekya Masaka empango bwanyima y’okukingaho enguuto nyeigyendwa eya Kampala – Masaka ahabw’enjura y’amaani n’emyegyemure kutwara orubaju rw’orutindo rwa Katonga.

MV Kalangala neyemerera Nakiwogo kurabira Kalangala kuza Masaka kandi MV Nodl netwara orwa Bukakata – Masaka – Nakiwogo omu munisiparite ya Entebbe omu disiturikiti ya Wakiso.

#WestUpdates