Abatuura omuri Buswaka Kagadi bacuramiriirwe ahamwanya ogu abantu barikuhika 10 bafeereiremu. PHOTO: Thomas Tumwebaze

N'ebya Thomas Tumwebaze

Abatuura b’ekyaro kya Muziizi A, omumuruka gwa Buswaka omu gomborora ya Kyaterekera omu disiturikiti ya Kagadi bagwerwa akagwe bwanyima y’abashaija babiri kandi enyina emwe okutema abazaire baabo hamwe n’ab'oruganda kandi bakaita 8.

UPDF nayo yakozesa obwangu kandi yateera amasasi abashaija aba nabo baafeeraho.

Amahe ga UPDF gateera amasasi kandi gaita abashaija 2, Obed Baguma ow’emyaka 33 hamwe na David Munyirambe, ow’emyaka 36, bwanyima y’abashaija aba kutemagura kandi bakaita abantu 8 obwo harimu abazeire baabo n’ab'eka yaabo. 

Amahe ga UPDF gaahika omuri Buswaka nikwo kwiha abainazi aba omumagara g'ensi egi. PHOTO: Thomas Tumwebaze

Obed Baguma ow’emyaka 33 hamwe na David Munyirambe ow’emyaka 36 bakatandikaho enyikiriza eyamanywa nka “God Holy Spirit Son of Man” kandi batandika okugyemesereza abazaire hamwe na bagyenzi baabo okubegaitaho, beitu hoona bayanga nikwo kuguma nibabatiinisiriza ngu nibaza kubaita.

Omukiro ekyabusheesha buri eriizooba aha shaaha 2 z’omwabazyo, nikigambwa ngu, abashaija aba batembirwe mwoyo kandi nikwo kutandika kutemagura ab’eka yaabo, 8 bakafeeraho.

Ku bwashesha, amahe ga UPDF hamwe na poorisi baagyezaho okukwata abashaija aba abaagyezaho nabo kubatema nikwe kubateera amasasi nabo bakafeeraho.

Samuel Ntirenganya, omuhwezi wa mukuru w’entebe y’okubanza owa Buswaka nagira ngu batungire okumanyisibwa ngu eka ya Munyirambe eriyo neitwa beitu kandi ku bagiire kuhikayo baashanga batabani be beine amatookyi kandi bariyo nibatematema omwe ahandiijo.

Enkuyanja y'abatuura ecuramiriirwe omuri Buswaka. PHOTO: Thomas Tumwebaze

Ntirenganya nagira ngu abashaija aba bakeecwa ahakika kyabo, batandikaho enyikiriza eyaabo kandi ngu batwire batari kukwatanisa n’abatuura.

Aba babeire beine ebibumbe abi barikuramya hamwe n'ebendera ebintu ebi poorisi yatwara.

Lillian Ruteeraho, omujwekyerwa wa Mukuru w'eihanga omuri Kagadi naagira ngu ti baheekyera ba ADF abakozire eki, nk'oku kibeire kirikugambwa beitu kandi ngu ekikorwa eki kikozirwe abantu abu bootsire barikutuura nabo. 

Omujwekyerwa wa Purezidenti, Lillian Ruteeraho (bumosho) arikugamba n'ab'eby'okerinda omuri Buswaka. PHOTO: Thomas Tumwebaze

Ruteraho yaashaba abatuura okumanya abantu abu barikutuura nabo nikwo babaase kwetangira obutemu nk’obu.

Ruteeraho yaahamya oku amahe ga UPDF gagyerizeho kukwata abashaija aba beitu bakarema, nikwo kucwamu okubateera amasasi kandi bakabaita.

Poorisi yaahamya abafiire nka Yokonia Isakara 76 kandi nyineka, Elinora Kabugho 64 kandi omukazi wa Yokonia, Oliver Kabugho 13, Ferdinand Baluku 13, Masika Kabagenyi 03, Anifa Kabugho 04, Praise Muhindo 07, hamwe na Boniface Munyirambe 41 boona bari ab’eka emwe.

Emibiri y’abagyenzi yatwarwa omuk'abafu Kagadi okukyeberwa.

Bo abatungire obuhuta harimu Julius Muge 06, Elmos Mukandirwa 49, Joyce Mbambu 28, Rogers Nzabara 27, Christine Biira 24, Zipora Kyakimwa 40, Yonasi Bwambale 06, Yonasi Masereka 05 hamwe na Biira Birungi 06 kandi aba boona bari omu irwariro barikutunga obujanjabi. 

#WestUpdates