Amaka aga gakatooranwa kuruga omu magomborora agarikukira kuteeganisibwa ebitengure omuri; Bundesi, Mabono, Nalwanza, Buluceke, Bushiyi, Bulucheke n’agandi mingi. Photo by Andrew Nakhaboya.

N’ebya Andrew Nakhaboya 

BUDUDA

Gavumenti erikurabira omu ofiisi y’enganzi y’eihanga eshohoize shiringi biriyooni 9 z’okufurura abantu abari omu myanya eri omu kabi k’okuteerwa ebitengure omu disiturikiti eya Bududa.

Esente ezi obwa hati ezaahikire omu Post Bank niziija kuhweraho omu kufurura amaka 846 ag’omu disiturikiti eya Bududa agu ofiisi y’enganzi y’eihanga yatooraine erikukwatanisa n’ekitongore ekitari kya Gavumenti beitu ekirikukwatanisa nayo, ekya Give Directly.

Amaka aga gakatooranwa kuruga omu magomborora agarikukira kuteganisibwa ebitengure agarimu; Bundesi, Mabono, Nalwanza, Bushiyi, Bulucheke n’agandi maingi. 

Ahansi y’entebeekanisa egi, buri ka neija kuba netunga shiringi miriyooni 10 hamwe na hiika y’eitaka omu kampu ya Bunambutye Resettlement Camp omu disiturikiti eya Bulambuli. 

Ekitongore ekya Give Directly kikaba kyahaire esente aha maka 4,000 ag’omu kyanga ekya Elgon agari omu myanya eri omu kabi k’okuteerwa ebitengure by'eitaka omuri za disiturikiti nk’eya Bududa, Manafwa, Bulambuli, Sironko na Namisndwa. 

George Emmanuel Owanyi, RDC wa Bududa agizire ngu eki nikiija kureetera buri ka kutunga shiringi miriyooni 17 kwongyerera ahari shiringi miriyooni 7 ezi buri ka ebaire yaahairwe kurabira omu kitongore ekya Give Directly. 

Owanyi naagira ngu buri ka yaaheza kutunga shiringi miriyooni 10, buri nyin’eka nateekateekwa kufurura eka ye kugitwara omu disiturikiti eya Bulambuli ninga omu mwanya ogundi oguri gye babaase kuruga aha mataka agu barikutuuraho obwa hati agu gavumenti erikwija kwegaruriza kubyaraho emiti.

Naagira ngu Gavumenti neekimanya gye ngu esente ezi barikuza kuheebwa tizirikwingana n’eitaka ryabo eri bariho beitu naabashaba okukwatanisa nabo ahabw’okwerinda kurinda amagara g’abantu.

Owanyi naagira ngu ehururu y’okufurura abantu aba neija kukorwa omu bicweka kandi abaratungye esente ezi nibaija kubanza bayehandiikisa.

Milton Kamoti Wasunguyi, Ceeyamaani wa disiturikiti eya Bududa naagira ngu esente ezi niziija kushashurwa abaine kuzitunga omu bwire bwa wiiki 2, Post Bank yaheza entebeekanisa z’okwiguraho akawunti zaabo n’okushomesa abaine kutunga esente ezi aha ku baine kuzikoresa.

Naagira ngu abandi abaraabe batatungire esente nibaija kutunga omu bicweka 
Wasunguyi nayongyera ashaba abari omu myanya eri omu kabi k’okuteerwa ebitengure okuruga omu myanya egyo bakatandika kutuura n’abanyabuzaare baabo obwo bategyerize okuhwerwa kwa gavumenti.

Bamwe omu batungire esente nibashaba gavumenti okubaheereza esente ezirikumara kugura eitaka omu disiturikiti yaabo ahamwanya gw’okubagyemesereza kubafurura.

#WestUpdates