Omuhwezi wa mukuru w’eby’amagara ahabwa disiturikiti ya Wakiso, Betty Nabuganda naagira ngu hariho ekyetengo ky’okuhwera abakazi b’enda abaine oburema aha mibiri yaabo. Photo by Violet Nabatanzi.

N’ebya Violet Nabatanzi

WAKISO

Gavumenti eshabirwe kuta omu marwariro ebitanda by’okuzaariraho eby’omutaano eby’abakazi b'enda abaine oburema aha mibiri yaabo.

Omuhwezi wa mukuru w’eby’amagara ahabwa disiturikiti ya Wakiso, Betty Nabuganda naagira ngu hariho ekyetengo ky’okuhwera abakazi b’enda abaine oburema aha mibiri yaabo.

Okurugiirira ahari Nabuganda, ebitando by’okuzaariraho ebiri omu marwariro n'ebya boona ekirikugumira abakazi b’enda abaine oburema okubikoresa.

Nabuganda agambire ebi obu abaire natongozaho purogyekiti y’omwaka gumwe ey’eminyeeto eine oburema aha mibiri yaabo akwataniise n’abakuru kuruga omu kitongore ekitari kya gavumenti ekya Together Alive Health Initiative (TAHI). Omukoro ogu gubaire aha mbuga nkuru za disiturikiti eya Wakiso.

Laura Kanushu, Omuny’ishengyero orikujwekyera abantu abaine oburema aha mibiri yaabo omu kugambaho nawe akyorekire ngu ebitanda by’okuzaariraho eby’abantu abaine oburema ebiri omu marwariro agamwe ni bikye.

Eki nikimanyisa ngu abakazi abaine oburema aha mibiri yaabo kubarikuza omu marwariro baburwa ebitanda by’okuzaariraho ekyakubaasa kureetera bahendera bazaariire ahansi.

Kanushu agizire ngu abarikugura ebitanda by’okuzaariraho obwire obwingi nibateekateeka ngu buri muntu nabaasa kubikoresa, agatari maziima.

Akyorekire ngu Paramenti etwire nerwanirira eky’okuta omu marwariro ebitanda by’okuzaariraho eby’okukoresibwa abantu abaine oburema.

Purogyekiti egi egyenderiire kwongyera kureeta hamwe eminyeeto eine oburema aha mibiri yaabo kuruga omuri za disiturikiti eya Wakiso na Mukono n’okureeba ngu enshonga zaabo zaakorwaho.

#WestUpdates