Ekishaayi ky'enyonyi ekya Kabalega ekiriyo nikikorwa omuri Hoima. Photo by Ambrose Nuwagaba Katooto.

N’ebya Ambrose Nuwagaba Katooto

HOIMA

Ekishaayi ky’enyonyi ekya Kabalega ekyabaire nikimanywa nka Kabaale International Airport omu disiturikiti eya Hoima nikiteekateekwa kwakiira enyonyi y’okubanza ey’emigugu omu kwezi kwa 12, 2023 kitakigwirweho kutandiika kuteekamaho enyonyi.

Omurimo gw’okukora ekishaayi ky’enyonyi ekya Kabalega omu gomborora eya Kabalega omu disiturikiti eya Hoima, ogumazireho dollar obukikuru 309 gukatandika ahabiro 18/04/2018. 

Kampuni eya SBC Uganda Ltd ekwataniise n’eya SBI International Holdings nizo zikozire omurimo ogu.

Okwigura ekishaayi ky’enyonyi eki kukaba kuteebekanisiibwe kubaho omu mwaka gwa 2022 beitu, Amos Muriisa, omugambirizi wa kampuni eya SBC Uganda naagira ngu omurimo ogu hati guri aha bucweka 98 ahari 100 kuhwa.

Omu kurambura kwa kakiiko akarikugaita hamwe amadiini aka Inter-religious council of Uganda okuteebekanisiibwe ab’ekitongore ky’omutindo gw’amajuta ekya Petroleum Authority of Uganda, Muriisa ahamize ngu nibateekateeka kwakiira enyonyi y’okubanza ey’emigugu kuhika aha kishaayi eki omu kwezi kwa 12, 2023.

Abakuru kuruga omu kakiiko aka Inter-Religious Council of Uganda n'abakuru kuruga omu Petroleum Authority of Uganda oteireho naaba konturakita baheza kurambura ekishaayi ky'ekyonyi ekya Kabalega. Photo by Ambrose Nuwagaba Katooto.

Peter Muriisa, omukuru kuruga omu kampuni eya Uganda National Oil Company (UNOC) naagira ngu ekishaayi eki nikija kuhweraho omu kutambuza emishuuburo hamwe n’okutunguura eby’oburambuzi.

Omu bigambo bye, Sheikh Shaban Ramadan Mubaje obaire aine ab’akakiiko k’amadiini omu Uganda asiimire gavumenti ahabw’omurimo oguriyo nigukorwa aha kishaayi eki.

Mubaje nakyoreka ngu aine amatsiko mingi ekishaayi ky’enyonyi ekya Kabalega nikija kuhindura aha miturire y’abantu oteireho n’okureetaho entunguuka omu kyanga eki.

#WestUpdates