Manegya w’eicundiro ry’amajuta ahiriire omumuriro yaafa- Rukungiri.

N’ebya Eddie Ssejjoba

RUKUNGIRI

Abatuura b’omu tauni ya Bagahwe omu disiturikiti eya Rukungiri bagweriirwe akagwe bwanyima ya manegya w’eicundiro ry’amajuta (Petrol Station) orikukora na Stabex eitaagi erya Kihiihi ahiire akayongotoka bwanyima y’ekimotoka ky’amajuta kugwa omu kiina kikakwatwa omuriro.

Abdullah Harman, 32, enzaarwa ya Somalia kandi manegya wa Stabex Fuel Station, ahiire yayongotoka yaafa kandi abandi bantu babiri abarimu dureeva na kigingi baatungire obuhuta bw’amaani.

Eki kibaire omu tauni ya Baghwe omu gomborora eya Bugangari aha ruguuto orwa Rukungiri- Kihiihi omu disiturikiti eya Rukungiri.

Pooriisi neegamba abatungire obuhuta nka; Qurash Mayengo, 35 (Dureeva) kandi omutuura w’omu rurembo rwa Mbarara hamwe na Brian Kiprimo, 27 (kigingi), enzaarwa ya Kenya.

Elly Maate, Omugambirizi wa Pooriisi ahabw’ekyanga ekya Kigezi naagira ngu butandu egi ebaireho shaaha nka 8:30 z’eihangwe aharwakabiri ebiro 20.08.2024 ekishanyararize eby’engyenda aha ruguuto orwa Rukungiri-Kihiihi kumara eshaaha nyingi.

Maate nashoborora ngu ekimotoka ky’amajuta ekihandiikirwe omu namba ya UAT 055G Mitsubishi FUSO kibaire nikiruga omuri Mbarara kirikuza ah’eicundiro ry’amajuta erya Stabex eitaagi erya Kihiihi.

Ahabw’akashuumo akari ahari Bagahwe haihi n’aha ‘roundabout’, omuvugi w’ekimotoka ky’amajuta obaire navuga siipidi erengire emuremereire nikwo kuremwa kuheta ekoona akahendeera atomiire ekipande ky’ahanguuto. Na bwanyima ekimotoka kigwire omu kiina nikwo kukwatwa omuriro.

Naagira ngu omutumbi gwa manegya gutwirwe omu kabafu ah’eirwariro erya Rwakabengo Health Centre IV kukyeberwa. Okurugiirira ahari Maate, butandu egi eretsirweho okuvugisa ekimama.

#WestUpdates