Omushaija aitsirwe omuri Kisoro bamunaga omu mufuregye.

N’ebya Omushaki weitu

KISORO- Omushaija otakamanyirwe aitsirwe abainazi abatakamanyirwe omu disiturikiti eya Kisoro.

Okurugiirira ahari Elly Maate, Omugambirizi wa Pooriisi ahabw’ekyanga ekya Kigezi- eki kibaireho aha Sande ebiro 19/05/2024 shaaha nk’emwe y’akasheeshe omu kyaro ekya Kashija omu tauni kanso eya Rubuguri omu disiturikiti eya Kisoro. 

Jackson Tumwesigye ashangirwe omutumbi gw’omushaija ogu omu mufuregye haihi na faamu ye kandi gubaire gushwekire amababi, gurekireebukaho okuguru kumwe obu abaire agiire kureeba ente ze aha faamu.

Tumwesigye amanyiiseho ceeyamaani w’ekyaro ekyo Bakina Sipriano oizire akamanyisaho Pooriisi.

Okurugiirira ahari Maate, omutumbi gw’omugyenzi gubaire gwine obuhuta aha maraka, ekirikworeka ngu acumitsirwe.

Abantu abakubaasa kuba baine omuntu waabo obabuzireho nibashabwa kuza omu kabafu ah’eirwariro omuri Kisoro kureeba yaaba omushaija ogu aitsirwe n’owaabo.

Maate naagira ngu okucondooza omu nshonga egi kuriyo nikugyenda omu maisho.

#WestUpdates