Minisita wa gavumenti z'ebyanga, Raphael Magyezi omuri Kagadi ahabya PDM..(Photo by Thomas Tumwebaze)

Minisita Magyezi nayetomboitira enkora ya PDM omuri Kagadi

N’ebya Thomas Tumwebaze

Minisita wa Gavumemti z’ebyanga, Raphael Magyezi nayetomboita oku puroguraamu ya gavumenti eya PDM eriyo nekorwamu omu disiturikiti ya Kagadi.

Disiturikiti ya Kagadi ekatunga shiringi biriyooni 15 omu miruka 151 beitu bagabireho shiringi miriyooni 300 zonka obwahati.

Minisita abandize okwiguraho omubutongore ekyombeko ekya tauni kanso eya Ruteete kandi Wellen Bamwesigye ori meeya wa tauni kanso ya Ruteete asiimire gavumenti ahabw’okubaha miriyooni 100 z’okwombeka embuga nkuru za tauni kanso yaabo.

Wellen Bamwesigye, Meeya wa Ruteete arikugambaho na Minisita Magyezi..(Photo by Thomas Tumwebaze)

Minisita Raphael Magyezi naagira ngu disiturikiti ya Kagadi eriyo netambura mpora agumize ngu eki nikiremesa abantu okwetunguura kandi hoona ashabire abeembezi ba Kagadi nka RDC n’abany’eishengyero okureeba ngu esente ezi tizaheebwa abagaiga, beitu hoona ab’okweyiha omubworo.

Ogu naagira ngu abatuura nibamanya batahi baabo abashemereire kuba nibatunga esente ezi.

Minisita Raphael Magyezi na bamwe ahabeebembezi omuri Kagadi..(Photo by Thomas Tumwebaze)

Minisita Magyezi nagumizamu agiira ngu gavumenti egyenderiire okutunguura omuntu w’ahansi kandi ngu buri eka eshemeriire okutunga miriyooni 1 hatariho kusharaho.

Barnabas Tinkasimire, Omuny’eishengero owa Buyaga West naagira ngu abakozi ba gavumenti z’ebyanga nibatunga akasente kakye kandi ngu kibaasa kuremesa enteekateeka ya PDM.

Barnabas ashabire gavumenti okwongeraho akasente aha bakozi b’ahansi nikwo babaase kuta omunkora PDM.

Minisita Raphael ahamukoro gw'okutongozaho PDM omuri Kagadi..(Photo by Thomas Tumwebaze)

Abanyeishengero abarimu Janepher Kyomuhendo Mbabazi, Omuny’eishengerokazi wa disiturikiti ya Kagadi hamwe na Denis Namara owa East Africa bashabire Minisita Magyezi okubahwera kwihaho ‘scheme’ ya Ruteete kandi kibaasiise abatuura okutunga ebyapa by’amataka gaabo.

Disiturikiti ya Kagadi eine emiruka 151 kandi ezi zoona zine SACCO ezirikubarikubarirwamu abantu 35,701 abarikuza kuganyirwa omu puroguraamu eya PDM.

PDM egyenderiire okuhisya obuheereza aha muntu w’ahansi, okwongyera entaasya y’amaka hamwe n’okutunguura eihanga.

#WestUpdates