Enganzi y'eihanga, Robinah Nabbanja arikukikisa orukiiko rw'ahonaaho orubaire omu ofiisi ye omuri Kampala Orwabakiri ebiro 03.12.2024. Photo by VPPU.

N’ebya Beth Akatukunda

KAMPALA

Purezidenti Yoweri Museveni aragiire minisiture y’eby’esente okurekura esente ahonaaho ez’okukora ahanshonga y’ebigwererezi n’okufurura abantu abari omu myanya eri omu kabi k’okuteerwa ebitengure n’omwegyemure kureeba ngu batwara omu myanya endaijo erigye.

Obwa hati, Omuhandiiki w’entuura omu minisiture y’eby’esente, Ramadhan Ggoobi naagira ngu minisiture eriyo netebeekanisa kurekura Sh50b kwenda ngu gavumenti ebaase kukora ahanshonga y’ebigwererezi.

Ggoobi naagira ngu gavumenti neyetenga sente zirikuhika Sh125b ez’okukora ahanshonga y’ebigwererezi omu kyanga ekya Elgon n’ekya Rwenzori.

Agambire ebi omurukiiko rw’ahonaaho orubagizireho n’enganzi y’eihanga, Robinah Nabbanja orubaire omu ofiisi y’enganzi y’eihanga omuri Kampala Orwakabiri ebiro 03.12.2024.

Nabbanja ashobooroire abahikire omu rukiiko oru ngu Purezidenti amuragiire kutwara enshonga y’ebigwererezi nk’eine kukorwaho ahonaaho.

Enganzi y’eihanga akyorekire ngu emitumbi y’abantu 28 niyo yaherize kuzoorwa bwanyima y’ebitengure ebyaretsireho enjura y’amaani kuteera disiturikiti eya Bulambuli wiiki ehwaire.

Abandi bantu 23 abaatungire obuhuta bakiriyo nibaragurirwa omu marwariro gatari gamwe.

#WestUpdates