Museveni, abeebembezi ba East Africa basiimire CAF ahabw’okubaikiriza kutaayaayisa eza AFCON.

N’ebya Beth Akatukunda

Abeebembezi b’omu mahanga aga East Africa Orwakashatu basimire munonga ahabwa Uganda , Kenya na Tanzania kusinga akaruuru k’okutaayaayisa empaka z’ekikopo ky’amahanga aga Africa eza AFCON.

Ogu n’omurundi gw’okubanza, empakaz ezi kutaayaayisibwa amahanga 3 bwanyima ya Ghana na Nigeria kutaayaayisa empaka ezi omu mwaka omu mwaka gwa 2000 hamwe na Guinea kutaayaayisa empaka ezi n’eihanga erya Gabon omu mwaka gwa 2012.
Amahanga 3 erya Uganda, Kenya na Tanzania basingire akaruuru akabaire nikahayanirwe eihanga erya Botswana, Egypt na Senegal bwanyima ya Algeria kuruga omu karuuru ah’eizooba ry’enyini ery’okuteera akaruuru erikugira ngu babaire baine enteebekanisa ensya ey’okutunguura omupiira gw’ebigyere.

Eihanga erya Egypt ryahisya emirundi 5 ririkutaayaayisa empaka ezi kandi eheererukire kuzitaayaayisa omugwa 2019, Senegal ekazitaayaayisa omurundi gumwe omu mwaka gwa 1992. Botswana ebaire eine amatsiko g’okutaayaayisa empaka eza AFCON omurundi gwayo gw’okubanza beitu tikibasikire.

Purezidenti Yoweri Museveni asiimire abateebekanisa b'empaka z'ekikopo ky'amahanga ga Africa ahabw'okwikiriza okushaba kwa Uganda, Kenya na Tanzania kutaayaayisa empaka za AFCON ez'omwaka 2027.

Museveni naagira ngu eki nikija kuhwera amahanga aga kumanywa munonga oteireho n'okutunguura eby'entaasya yaago na munonga ekitongore eky'eby'oburambuzi.

Purezidenti wa Tanzania, Samia Suluhu Hassan ayorekire amashemererwa arikurabira ahamukura gwa Social Media. Twine okushemererwa ahabw’okuheebwa omugisha gw’okutaayaayisa empaka za AFCON ez’omwaka 2027 tukwataniise na Kenya hamwe na Uganda. Ninyenda kusiima buri omwe oteiremu amaani kureeba ngu eihanga ryeitu ryaheebwa omugisha ogu ogutari gwa buriijo,” Suluhu arikushoborora.

Omuhwezi wa Purezidenti w’eihanga erya Kenya, Rigathi Gachagua nawe asiimire ekitongore ekirikukurira omuzaano gw’ebigyere omuri Africa ekya CAF ahabw’okuheereza amahanga ga East Africa omugisha gw’okutaayaayisa empaka za AFCON, 2027.

#WestUpdates