Museveni arikubuganaho abeebembezi b'akakiiko k’abakazi aka National Women’s Council n’ekya NRM Women’s League aha maka g’obwa Purezidenti, Entebbe. Courtesy Photos.

N’ebya Omushaki weitu

ENTEBBE

Purezidenti Yoweri Museveni nashaba abeebembezi b’abakazi okuburira engiri kureeba ngu buri omwe yayejumbira omu kukora ebirabaretere esente ahamwanya gw’okumarira obwire omu by’obutegyeki.

Ahaireho okushaba oku nyomwebazyo ebiro 07/03/2024 obu abaire nagambaho n’abeebembezi b’akakiiko k’abakazi aka National Women’s Council hamwe n’ekya NRM Women’s League aha maka g’obwa Purezidenti, Entebbe.

Abeebembezi b’akakiiko k’abakazi aka National Women’s Council hamwe n’ekya NRM Women’s League aha maka g’obwa Purezidenti, Entebbe barikubuganaho Purezidenti Museveni.

Purezidenti ahabwire abeebembezi b’abakazi okuhabura abantu abaine amataka makye kwejumbira omunkora eya ‘four-acre model’ ahi hiika y’okubanza orikubaasa kuhingaho omwani, hiika ya kabiri ohingaho ebijuma, hiika ya kashatu ohingeho eby’okurya ebya famire kandi hiika ya kana nobaasa kuhingaho ebinyatsi by’amatungo kandi omu rubaju rw’enju nobaasa kuriisizaho enkoko, empuni n’eby’enyanja.

Purezidenti Museveni amanyiise abeebembezi b’abakazi ngu oihireho okwejumbira omu buhingi obw’okwihamu esente, nabwo nimubaasa kuhabura abantu kwejumbira omu puroguraamu z’emyooga, PDM n’ezindi eziraabahwere kuruga omu bworo.

Purezidenti ahabwire abeebembezi b’abakazi okuhabura abantu abaine amataka makye kwejumbira omunkora eya ‘four-acre model’.

Museveni ayongiire yamanyisa abeebembezi b’abakazi ngu ekiteiso kyabo eky’okumushaba kwesimbaho omu karuuru ka 2026 nikiija kuganiirwaho omu bukiiko bw’ekigombe kya NRM kandi encwamu erarugyemu neija kuba nerangirirwa omu bwire butari bwa hare.

#WestUpdates