Museveni ataabaarukize Tshisekedi owa DRC ahabw’okusinga akaruuru. Courtesy Photo.

N’ebya Omushaki weitu

Purezidenti Yoweri Museveni ataabaarukize Purezidenti wa Democratic Republic of Congo, Felix Tshisekedi ahabw’okusinga akaruuru akarangiriirwe akakiiko k’eby’oburuuru ak’eihanga erya Congo.

“Abanya-Uganda bataahi bangye hamwe n’abantu ba DRC; ninyenda kutwara omugisha ogu ahabw’abanya-Uganda kutaabaarusya H.E Felix Tshisekedi ahabw’okusinga akaruuru ka Congo, Museveni arikushoborora aharw’okubanza ebiro 01/01/2024.

Purezidenti nakyoreka ngu Tshisekedi akozire omurimo muhango obwo arikureeta Congo omu mukago gw’amahanga aga East Africa hamwe n’okutwikiriza kukora n’amahe ga Congo omu kurwanisa abahekyera ba ADF omuri Burugwa-Izooba bwa Congo.

“Nitwija kwongyera kukwatanisa n’abantu hamwe na gavumenti ya Uganda,” Museveni arikwongyera kushoborora.

Tshisekedi aha Sande, ebiro 31/12/2023 asingire akaruuru k’encuro ye ya kabiri omu ofiisi okurugiirira aha birugire omu kuteera akaruuru akateirwe ebiro 20/12/2024, akaruuru aku abeebembezi b’orubaju oruhakani barikugira ngu kiibirwe kandi nibashaba ngu kagarukwemu.

Akakiiko k’eby’oburuuru nikoreka ngu Tshisekedi aihireyo obucweka 73 ahari 100 y’oburuuru obuteirwe. Abateire akaruuru aka nibingana obucweka 43 ahari 100.

Moise Katumbi, omushuubuzi kandi omugaiga w’amaani niwe abaire owa kabiri n’oburuuru burikwingana obucweka 18 ahari 100.

Ababaire beesimbireho 9 ab’orubaju oruhakani abarimu Mukwege, Martin Fayulu na Katumbi n’abandi bateire omukono aha kihandiiko ky’okurangiirira ebirugire omu karuuru aka barikuhakanisa ebirugiremu kandi nibenda akaruuru kagarukwemu katerwe.

#WestUpdates