Okuhurira omushango gw’okwita AIGP Felix Kaweesi nikugarukamu eriizooba

Okuhurira omushango gw’okwita AIGP Felix Kaweesi nikugarukamu eriizooba

N’ebya Michael Odeng

Okuhurira omushango ahi abashaija munana barikujunaanwa okwita owabaire ari omugambirizi wa pooriisi, Andrew Felix Kaweesi nikugarukamu eriizooba aha International Crimes Division omu kooti enkuru omuri Kampala.

Ahabiro 9/5/2023, Omuramuzi Alice Komuhangi akaraagira okukwatwa kwa Shafik Kasujja, orikugambwa kuba yahungiire omuri DRC bwanyima y’omwaka gumwe areekwirwe. Hoona n’abeema ba Kasujja tibarareebekireho omu kooti.

Kasujja n’omwe ahabashaija 8 abareekwirwe aha bail omuramuzi wa kooti enkuru, Lydia Mugambe ahabiro 19/3/2019.

Kasujja najunaanwa okuba memba w’ekigombe ky’abahekyera ekya ADF abarikukorera omuri DRC.

Abandi abarikujunaanwa kwita Kaweesi harimu Abdul-Rashid Mbaziira, Aramanzani Noordin Higenyi a.k.a Taata Abdullazack, Yusuf Mugerwa a.k.a Wilson, Bruhan Balyejusa a.k.a Jimmy Masiga Ogutu, Joshua Magezi Kyambadde a.k.a Abdu Rahman, Jibril Kalyango a.k.a Abu Aisha na Yusuf Siraje Nyanzi a.k.a Jimmy Ssentamu.

Kaweesi akateerwa amasasi yafeeraho ahabiro 17/3/2017 omuri Kulambilo, hamwe n’omukumi we Kenneth Erau n’owaabire namuvuga, Godfrey Mambewa.

#WestUpdates