Ekituuru eki Aakiishopu Paul K. Bakyenga ofiire araaziikwemu. Ekishushani n'ekya Aidan Bataringaya.

N’ebya Aidan Bataringaya

MBARARA

Okutimba n’okutebeekanisa ekituuro omu kereziya eya Nyamitanga, ahi Aakibiishopu Paul Kaamuza Bakyenga ofiire nyomwebazyo, araaziikwe kwatandika.

Ekituuru eki Aakibiishopu Paul Bakyenga ofiire araaziikwemu omu kereziya ya Nyamitanga,Mbarara. Ebishushani byona n'ebya Aidan Bataringaya.

Bakyenga ofeeriire aha myaka 79 agwire ah’irwariro erya Nsambya omuri Kampala.

Omurimo gw’okutimba ekituuru gwebembeirwe Bwanamukuru wa Nyamitanga, Rev. Fr. Richard Ssebugwawo na ba inginiya ba Aakidayosiisi.

Ekituuro eki kyatimbwa aha mukono gwa buryo waaba notaaha omu kereziya haihi na rutaaru kandi kihikaine n’ekituuru kya Biishopu w’okubanza owa Mbarara, Francis-Xavier Lacoursiere, owabaire Biishopu w’okubanza w’eitware eri okuruga omu mwaka gwa 1934 okuhisya 1956.

Eikuuru ekiraziikwemu Omugyenzi Paul K. Bakyenga.

Omu kasheeshe k’eriizooba, habaho misa y’okwinamira Bakyenga omunda y’ekereziya ya Nyamitanga kandi yaayebeemberwa Bwana Mukuru wa Burunga Parish omuri Kazo, John Mary Vianney Kanyesigye. 

Omu misa egi, Kanyesigye yaashaba abaikiriza okukuratira engiri n’ebikorwa by’omugyenzi Bakyenga.

Fr Vianney n’omwe ahabasaseredooti 7 abatungire eidaara eri ahabiro 19/07/2014 abarikukuza emyaka 9 omubusaseredooti eizooba eri.

Bakyenga niwe araabe Biishopu wa kabiri kuziikwa omu kereziya ya Nyamitanga bwanyima ya Biishopu Francis-Xavier Lacoursiere owabaire Biishopu w’okubanza w’eitware eri.

Misa egi nabwo yaahikwaho Omuny’ishengyero-kazi w’orurembo rwa Mbarara Rita Atukwasa Bwahika hamwe n’omuhwezi wa Ceeyamaani w’akakiiko k’eby’oburuuru omu kigombe ekya NRM John Alimpa Kigyaji abagamba ahari Bakyenga nk’omushaija obaire ari omunya-Mbabazi, omwekambi, arikutwaza gye kandi arikukunda kuhwera abantu.

Entebeekanisa z’okuziika ziriyo nizigyenda omu maisho kandi omutumbi gwa Bakyenga niguteekateekwa kureetwa ahari Nyamitanga aharwakataano shaaha 12 z’omwabazyo kwongyera kumushabira okurugiirira ahari puroguraamu y’okuziika eshohoziibwe Aakibiishopu wa Mbarara, Lambert Bainomugisha.

#WestUpdates