Omuduumizi w’ekihome akwateirwe okwita omusibe.

N’ebya Saidi Engola & Hudson Apunyo

OYAM

Pooriisi omu disiturikiti eya Oyam ekwatsire orikukurira ekihome ekya Anyeke omuri Oyam ahabw’okugambwa kuba aitsire omusibe.

Edison Muhangi, Omuduumizi wa Pooriisi ya Oyam ahamize okukwatwa kw’omu Pooriisi w’ebihome omanyirwe nka Karim Sserunkuma.

Muhangi naagira ngu okukwatwa kwa Sserunkuma kwizireho bwanyima y’okuragira kwa RDC wa Oyam, William Komakeck.

Sserunkuma akatwarwa Oyam nka mukuru w’ekihome kya Anyeke omu kwezi kwa 8, 2023 arikuza omu bigyere bya Amos Niwahereza (SP), owabaire agiire omu kahuumuro.

Okurugiirira ahari Komakeck, eki kibaireho ebiro 14.06.2024 obu omusibe omanyirwe nka Oscar Otim, 20, omutuura w’ekyaro kya Barolimo omu gomborora eya Kamdini abaire agiire omu musiri gw’ebicoori kuhinga.

Omusibe agyerizeho kutoroka omu musiri nikwo kugwa omu kiina kya kamina. Aha shaaha egyo, omu Pooriisi w’ebihome akwatsire embundu kuruga ahari omwe aha ba Pooriisi b’ebihome nikwo kuteera amasasi omusibe obu obu abaire akiri omuri kamina.

Amasasi garabire omu eibondo rya Otim n’omu bicweka bye by’ekihama kandi afiire arikutwarwa ah’eirwariro erihango erya Lira.

Omuduumizi wa Pooriisi, naagira ngu okucondooza omu nshonga egi kuriyo nikugyenda omu maisho.

RDC ajumiriire ekikorwa ky’omu Pooriisi ogu arikugira ngu ogu n’omurundi gwa kabiri, ekikorwa ky’okuteera abasibe amasasi kirikubaho omu bwire bw’okwezi kumwe.

#WestUpdates
#RadioWestAt25