Okurugiirira ahari kooti, Ecee neija kukomerwa omu kihome kya Luzira Maximum Prison ahabw’ekifubiro ky’okukomwa amagara gye goona. Photo by Hudson Apunyo & Joseph Ekol.

N’ebya Hudson Apunyo & Joseph Ekol

OYAM

Kooti y’ekinyamahe eya SFC ecweriire omuserukare waayo kukomwa amagara gye goona ahabw’okusingisibwa omushango gw’okwita n’obushuma.

No. RA/239288 Julius Ecee, omuserukare orikukora na Artillery Regiment ahari Weza, Kawaweta omu disiturikiti eya Nakaseke, asingisiibwe emishango egi 2.

Ekitongore ky’amahe ekya SFC n’ekitongore ekirikujunanizibwa aha kurinda Purezidenti wa Uganda n’endiijo murimo y’amaani omu eihanga.

Abahababi nibagira ngu ahabiro 26/12/2023 omu tauni kanso ya Loro omu disiturikiti eya Oyam, Ecee akaita Isaac Okola Kizito. Nabwo, akagaruka yayiba shiringi 65,000 kuruga ahari Lilly Obote ow’omu kyaro nikwo kimwe aha bwire nibwo bumwe.

Okuhurira omushango ogu omurundi gwa kashatu kubaire omu tauni kanso ya Loro ahi omushango ogu gwakoriirwe kandi kubaire kukuriirwe, Lt. Col. Moses Nabasa.

Omuserukare obaire ajwire unifoomu y’amahe eyakinyansi ayehakaine mishango yombi beitu orubaju oruhababi ruhaireyo abajurizi 16 kumwomesereza aha mishango egi.

Okurugiirira aha bujurizi obuhairweyo, kooti esingiise Ecee emishango 2 ebaire nemujunaanwa nikwo kumucwera kukomwa amagara gye goona ahabw’omushango gw’okwita hamwe n’okukomwa emyaka 40 ahabw’omushango gw’obushuma beitu ebifubiro ebi naija kuba nabikora Mukono gumwe.

Okurugiirira ahari kooti, Ecee neija kukomerwa omu kihome kya Luzira Maximum Prison ahabw’ekifubiro ky’okukomwa amagara gye goona.

#WestUpdates