Okwatsirwe amanyirwe nka Glorious Baguma omutuura wa Kyabiranga omuri Bukiro tauni kanso, Mbarara ahabw'okwanga kubarwa. PHOTO by Evans Taremwa.

N’ebya Evans Taremwa

MBARARA

Omukazi w’emyaka 44 omu disiturikiti ya Mbarara akwatsirwe Pooriisi ahabw’okwanga kubarwa omuhururu y’okubara abantu n’ebintu byabo erikugyenda omu maisho omu Uganda.

Okwatsirwe amanyirwe nka Glorious Baguma kandi omushaija we omanyirweho erya Baguma ryonka ojukire omu mikono ya Pooriisi yayiruka kandi ariyo nahiigwa. 

Eki kibaire omu kyaro ekya Kyabiranga omu tauni kanso ya Bukiro omuri Kashari South omu disiturikiti eya Mbarara.

Nikigambwa ngu orikubara abantu agiire omu maka ga Baguma omuri Kyabiranga, omu tauni kanso ya Bukiro ahi ashangire omukaziwe Glorious Baguma beitu akanga ngu batamubara arikugira ngu ediini yaabo eya ‘ENGIRI’ terikwikiririza omu kubara abantu n’ebintu byabo ngu ahabw’okuba n’ekikorwa kya sitaane kandi ngu bo Yesu akababara kare.

Emmy Kateera Turyabagyenyi, RDC wa Mbarara aragiire okukwatwa kwa Glorious Baguma bwanyima y’okutunga amakuru kuruga omu beebembezi ba Bukiro ngu hariho eka omuri Kyabiranga eyayanga kubarwa.

Kateera nashoborora ngu ehururu egi ey’okubara abantu egyenderiire kuhwera gavumenti kubaasa kuteekateekyera gye abantu baayo.

Arabwire abantu abarikutamba ikono puroguraamu egi ngu nibeija kukwatwa bakorweho nk’oku ebiragiro birikugamba.

Obwa hati, Glorious Baguma akomiirwe aha Pooriisi ya Bwizibwera ahi arikwija kutwarwa omu kooti akateebwaho omushango gw’okutamba ikono puroguraamu ya gavumenti.

#WestUpdates