Omushaija aitsire nyina n’omurumuna omuri Kyankwanzi.

N’ebya Omushaki weitu

KYANKWANZI

Pooriisi omu disiturikiti eya Kyankwanzi ekwatsire omushaija orikuteekateekwaho kuba atabukire omutwe ahabw’okugambwa kuba aitsire nyina hamwe n’omurumuna.

Ronald Ssemanda, 30, nagambwa kuba aitsire nyina Sylivia Namaganda, 50, hamwe n’omurumuna Robert Ssenyonga, 24.

Ekikorwa ky’obwinazi eki kibaireho Orw’okubanza ebiro 09.09.2024 omu kyaro ekya Kiyuni omugomborora eya Gayaza omu disiturikiti eya Kyankwanzi.

Racheal Kawala, Omugambirizi wa Pooriisi ahabw’ekyanga ekya Wamala, naagira ngu nyakuteekateekwaho hamwe n’abagyenzi bakaruka omu maka gaabo agarikushangwa omu kyaro ekya Bukekete omugomborora eya Makulubita omu disiturikiti eya Luwero omu kwezi kwa 6, 2024 barikuza kushabira omu maka ga Rev. David Ssejjembaa, omwahure w’ekanisa ya Nakandura C.O.U omukyaro ekya Kiyuni omu disiturikiti eya Kyankwanzi.

Nikigambwa ngu aba bakaba batwire nyakuteekateekwaho kumushabira akabaasa kukizibwa endwara y’okutabuka omutwe ei atwire nayo kumara obwire buringwa.

Ah’eizooba ry’okubanza, nyakuteekateekwaho (Ronald Ssemanda) akwatsire enkoni yagiteera omurumuna (Robert Ssenyonga) yamwitiraho kandi ku aherize yakoresa enkini niyo emwe yagiteera nyina (Sylivia Namaganda). 

Namaganda aizire kufeera ah’eirwariro ahu abaire airukangiziibwe.

Kawala nagira ngu batwire nyakuteekateekwaho kumukyebera kumanya yaaba atabukire omutwe obwo okucondooza kurikugyenda omu maisho.

#WestUpdates