Minisita w'ebiragiro, Nobert Mao ( Bury), Ishabaramuzi Owiny-Dollo ( Left) n'abandi aha kutongoza rupoota y'ekitongore ky'oburamuzi ey'omwaka 2022/2023 omuri Kampala.

N'ebya Omushaki weitu.

Ishabaramuzi Alfonse Owiny Dollo nakyoreka ngu omwijurirano gw'emishango omuri za kooti gukyendiire kuruga aha bucweka 32 ahari 100 gwaza aha bucweka 27.4 ahari 100.

Ishabaramuzi Alfonse Owiny-Dollo arikwanjura rupoota y'ekitongore ky'oburamuzi ey'omwaka gwa 2022/2023 omuri Kampala. Photos by Mpalanyi Ssentongo

Owiny Dollo naagira ngu ekireteire omwijurirano gw'emishango gwakyendeera nahabw'okugira omubaro mwingi gw'abaramuzi hamwe n'okwongyera aha mbaririra y'ekitongore ky'oburamuzi kuruga ahari shiringi biriyooni 199 kuza ahari shiringi biriyooni 381.

Owiny-Dollo agambire ebi obu abaire nahayo rupoota ya buri mwaka y'oku ekitongore ky'oburamuzi kyakoziremu omu mwaka gw'eby'esente ogwa 2022/2023 aha kooti enkuru omuri Kampala aharwakataano ebiro 20/10/2023 kandi abaire najanjurira abarikukwatwaho omu kitongore ky'oburamuzi n'abandi. 

Ishabaramuzi Alfonse Owiny-Dollo arikwanjurira abarikukwatwaho omu kitongore ky'oburamuzi rupoota y'ekitongore ey'omwaka gwa 2022/2023 omuri Kampala.

Ahabw'okukora gye, Owiny-Dollo arikwema aha kucondooza okukozirwe aba Avocats Sans Frontiers, agizire ngu abantu abarikwejunisa za kooti kandi bakazikiririzamu beyongiire kuruga aha bucweka 61 ahari 100 kuza aha bucweka 71 ahari 100.

Naagira ngu ekitongore ky'oburamuzi kyongiireho aha mishango erikuhurirwa ekahwa kuruga aha mishango 156,875 omu mwaka gw'eby'esente ogwa 2020/21 kuza aha mishango 205,967 omu mwaka gwa 2021/22 kuhikira kimwe aha mishango 266,323 omu mwaka gw'eby'esente ogwa 2022/2023.

Ishabaramuzi Alfonse Owiny-Dollo n'abandi abarikukwatwaho omu kitongore ky'oburamuzi aha mushomo gw'okwanjura rupoota y'ekitongore ey'omwaka gwa 2022/2023.

Rupoota nabwo neyoreka ngu emishango erikuhababwa ni nyingi munonga kandi nerikuhurirwa ekahwa nayo ni nyingi.

Bamwe aha bahikire aha mukoro gw'okwanjura rupoota y'ekitongore ky'oburamuzi ey'omwaka gw'eby'esente ogwa 2022/2023 omuri Kampala. Photo by Mpalanyi Ssentongo.

#WestUpdates