Purezidenti Yoweri Museveni arikubuganaho abeebembezi ba Acholi aha nshonga z'abaraaro. Photos by PPU.

N’ebya Beth Akatukunda

ENTEBBE

Purezidenti Yoweri Museveni abugaineho abeebembezi kuruga omu kyanga ekya Acholi aha maka g’obwa Purezidenti, Entebbe kandi aba baganiire aha nshonga zitari zimwe.

Pureizdenti Museveni arikubuganaho abeebembezi kuruga omu kyanga ekya Acholi kuganiira ahanshonga z'abaraaro, aha maka g'obwa Purezidenti, Entebbe.

Abeebembezi aba babaire beebembiirwe ishabaramuzi Alfonse Owiny-Dollo. Omu rukiiko oru, Purezidenti Museveni hamwe n’abeebembezi baganiire ahanshonga nyingi ezirimu enshonga z’eitaka rya Baraaro omu kyanga ekya Acholi.

Bamwe omu beebembezi kuruga omu kyanga ekya Acholi abetabire omu rukiiko na Purezidenti Yoweri Museveni aha State House, Entebbe kuganiira ahanshonga z'abaraaro.

Aha biro 19/05/2023, Purezidenti Museveni akashohoza ekihandiiko bwanyima y’okuhendera orutaayaayo rwe omu kyanga eki ahi yaaraganiise kukora aha nshonga z’abariisa b’aba Baraaro.

Omu kihandiiko eki, Purezidenti Museveni akemereza Abaraaro boona abari omu kyanga ekya Bukizi bwa bumosho bwa Uganda.

Aba bakaba bari ab’okuruga omu kyanga eki aha muheru gw’okwezi kwa 6, 2023 beitu bakaija bayongyezibwayo kuhisya ebiro 30/09/2023.

Beitu hoona, Purezidenti Museveni akagaruka yayongyerayo obwire bw’okuta ekiragiro kye omunkora kuhisya eriizooba ebiro 20/10/2023 kubaasa kutunga obwire bw’okushwijuma za rupoota ensya aha mirimo y’abaraaro omu kyanga eki. Okwongyezayo oku Purezidenti yateireho nikuhwayo eriizooba.

Abeebembezi ba Acholi abetabire omu rukiiko na Purezidenti Museveni aha maka g'obwa Purezidenti, Entebbe.

Abeebembezi omu kyanga ekya Acholi bagambiire Purezidenti ngu abalaalo abamwe nibakoresa amaziina g’abakuru omu gavumenti kukora emishango nk’okwiba amataka, okucwekyereza emisiri y’abantu n’ebindi bikorwa bitaboniire.

Museveni araganiise abeebembezi aba ngu enshonga egi neija kukorwaho barikureetaho obumwe n’entuura nungi ahagati y’abantu ba Acholi hamwe n’abariisa.

Abeebembezi ba Acholi ababugaineho Purezidenti Yoweri Museveni aha maka g'obwa Purezidenti, Entebbe.

Orukiiko oru rwetabirwemu minisita w’ebigwererezi, Hillary Onek, Minisita w’eihanga ow’enshonga z’aheeru, Henry Okello Oryem, Minisita w’eihanga ow’eby’entaasya, Beatrice Akello Akori, Omuny’ishengyero wa Bardege- Layibi, Martin Ojara Mapenduzi, Omuny’ishengyero owa Kilak, Hon. Anthony Akol, ab’eby’obuhangwa n’abandi abarikukwatwaho.

#WestUpdates