Omugyera gwa Kafu gubongire omu eihangwe gw’orw’okubanza kandi abatuura baingi basigaire bashobangiriirwe betaine hokuraba. Photo by Asiimwe Wilson.

N’ebya Wilson Asiimwe

HOIMA

Omwegyemure oguretsirweho enjura y’amaani egwire omu kicweka eki gushazireho oruguuto orwa Hoima-Kampala bwanyima y’omugyera gwa Kafu kwijuramu amaizi gukabooga.

Omu mwabazyo gw’orw’okubanza, ekitongore ky’enguuto omu eihanga ekya Uganda National Roads Authority (UNRA) kirangiriire ngu omugyera gwa Kafu agurikunywanisa disiturikiti eya Hoima na Kyankwanzi gwijuriraine amaizi gwabooga kandi ngu ahabw’enshonga egi oruguuto oru rukingirweho.

Omugyera gwa Kafu gubongire omu eihangwe gw’orw’okubanza kandi abatuura baingi basigaire bashobangiriirwe betaine hokuraba.

Julius Hakiza, Omugambirizi wa Pooriisi ahabw’ekyanga ekya Albertine naagira ngu Pooriisi egyemesereziibwe kukinga oruguuto oru bwanyima y’amaizi kuguma nigeyongyera kweshuka omu ruguuto.

Hakiza naagira ngu ekitongore kya Pooriisi y’eby’ahanguuto omu kyanga eki kyatandikire kuhabura abantu abarikukoresa oruguuto oru kuza Kampala nari Kyankwanzi okuraba Masindi.

Jackson Atuhaire, omuvugi aha ruguuto orwa Hoima-Kampala naagura ngu okuvuga omu maizi aga n’ekyakabi ngu ahabw’okuba emotoka nebaasa kuhendera etwirwe amaizi.

Mwesige naagira ngu kuraba Masindi ni hare kandi nikija kureetera ebishare by’entambura byayeyongyera. Okuruga Hoima kuza Kampala ni shiringi 20,000. Beitu kuza kuraba Masindi kuza Kampala niheyongyera kiromita 70 ekirikumanyisa esente ziine kweyongyera.

"Okuruga Hoima kuza Kampala kurabira Masindi n’orugyendo rwa hare kwonka titurikubaasa kuta amagara g’abashabaazi omu kabi kandi ahari ‘transport’ twongiireho shiringi 20,000.

Abeegi abarikuruga Kyankwanzi kuza kushomera ah’eishomero erya Katereiga Parents Primary School omuri Hoima tibakiiza kushoma ahabw’okuba orutindo orubabaire nibarabaho rujabamu omu maizi.

Allan Ssempebwa, Omugambirizi w’ekitongore ekya UNRA naagira ngu omugyera ogwa Kafu guboogire omu kyaro ekya Karongo omu muruka ogwa Kikonda, kiromita 19.8 kuruga omu tauni ya Hoima nikwo kushanyaraza emirimo y’omu kicweka eki.

"Ab’ebiruka kuruga Kampala kuza Hoima nibahaburwa kukoresa oruguuto orwa Hoima-Masindi-Kafu-Luwero-Kampala nainga orwa Hoima - Buhimba - Nalweyo- Kakumiro- Mubende – Kampala," Ssempebwa arikushoborora.
 
#WestUpdates