Ow’emyaka 14 omuri Rwamapara aitsirwe, yaanagwa omu Rwizi

N’ebya Andrew Tushabe 

RWAMPARA

Poorisi omu disiturikiti ya Rwampara ekwatsire abantu 9 abarikuteekateekwaho kuba baine akakwate n’okwita omwana w’emyaka 14 bakanaga omutumbi gwe omu mugyera gwa Rwizi.

Samson Kasasira, Omugambirizi wa Pooriisi ahabw’ekyanga ekya Rwizi, naagamba omugyenzi nka; Ssenyondo Mariamungu, 14, ow’omu kyaro ekya Kikonkoma omu tauni kanso ya Kabura omu disiturikiti eya Rwampara.

Nikigambwa ngu ahabiro 01/01/2024, aba famire abarimu Nalongo Korubaro, muk’eishe w’omugyenzi bakakwata Ssenyondo (omugyenzi) barikumuteekateekaho kuba yabaire aine emyenda n’esimu by’omwe omu barikuteekateekwaho.

Aba bakamuteera kuhisya obu yagambire ahu yabaire asherekire emyenda egyo nikwo kubeebembera akabatwara omu tauni ya Nyeihanga ahi baashangire emyenda egyo na bwanyima bakagaruka omuka n’omugyenzi ahari shaaha nka 11 z’ekiro omu maka ga Nalongo Korubaro ahi baateeriire Ssenyondo bakamwita.

Aha biro 03/01/2024 shaaha 6 z’ekiro, banyakuteekateekwaho bakapangisa emotoka eya Agaba Owen batamu omutumbi gwa Ssenyondo obwo bashendekyereziibwe Mweteise Micheal na Arinaitwe Patrick nikwo kugunaga omu mugyera gwa Rwizi.

Kobusingye Evalyne, 38, nyina wa Ssenyondo (omugyenzi) kandi omutuura wa Kicwamba omuri Mbarara ahababire omushango aha Pooriisi bwanyima y’okuhurira amakuru aga kandi omutabani yabaire abuzire ekirugiiriremu okukwatwa kwa Mweteise Michael, Arinaitwe Patrick hamwe na Agaba Owen 

Kasasira naagira ng ku baababurize akasyo n’akahindu, banyakuteekateekwaho bagambire ekyabaireho n’abari enyima y’omushango ogu nikwo kutandika kuronda omutumbi gw’omwana ogu kuhisya nyomwebazyo obu omutumbi gwe ogubaire gwatandikire kujunda gwihirwe omu mugyera gwa Rwizi omu rurembo rwa Mbarara.

Banyakuteekateekwaho boona abari omu mushango ogu n’abanyabuzaare b’omugyenzi abaamukurize kuruga omu buto bwanyima ya nyina kutaana n’ishe omu disiturikiti eya Mityana. Ogu bakaija bamukwatsa muk’eishe, Nalongo Korubaro.

#WesUpdates