Dimintiria Nalukwago arekwirwe aha musingo gwa sente ahabw’emyaka ye kandi we Edward Bagala asindikirwe aha rumanda kuhisya ebiro 11.09.2024 obu baragarukye omu kooti kwongyera kumushomera omushango.

N’ebya Omushaki weitu

MPIGI

Ekitongore ekirikurwanisa obushomankuzi omu State House hamwe n’ekitongore kya Pooriisi ekirikucondooza aha mishango batwire abantu babiri omu kooti ahabw’enshonga z’eitaka. 

Omu batwirwe omu kooti harimu omukazi w’emyaka 85.

Banyakuteekateekwaho babiri bamanyirwe nka; Edward Bagala, 47, omushuubuzi kandi omutuura w’omu kyaro kya Nakirebe omuri Mpigi hamwe na Dimitiria Nalukwago, 85, omutuura w’omu kyaro nikyo kimwe.

Ababiri aba bareebukireho omu maisho g’omuramuzi wa kooti ya Mpigi ey’eidaara ry’okubanza, Fatumah Nabirye kandi bateirweho emishango 2 ey'okuryangatanisa eitaka.

Edward Bagala, ateirweho omushango gwa kashatu ogw’okucupura ebihandiiko ebirimu n’ebaruha ezi yahaireyo aha Pooriisi.

Obuhababi nibugira ngu ababiri aba ahagati y’okwezi kwa 8, 2022 n’okwa 8, 2024 omu kyaro ekya Nakirebe omugomborora eya Kiringente omuri Mpigi bataahirira eitaka rya famire y’omugyenzi Emmanuel Kawooya bagaruka batema emiti eyabaire erimu. 

Eitaka eri riri ahari block 119 Mawokota, purooti ya kabiri.

Kooti ehurire ngu Edward Bagala obu yabaire ari Nakasero omu rurembo Kampala akacupura ebihandiiko by’omu Pooriisi Justus Twinamatsiko orikukora n’ekitongore ekya State House Anti-Corruption Unit ebi yahaire Dimintiria Nalukwago arikworeka ngu niwe mukama w’ekibanja ah’eitaka ry’omugyenzi Emmanuel Kawooya.

Ababiri aba behakaine emishango erikubajunaanwa. 

Dimintiria Nalukwago arekwirwe aha musingo gwa sente ahabw’emyaka ye kandi we Edward Bagala asindikirwe aha rumanda kuhisya ebiro 11.09.2024 obu baragarukye omu kooti kwongyera kumushomera omushango.

#WestUpdates