Among nakyoreka ngu abany’ishengyero abaingi abashaija nibaruga omu byaro byabo bwanyima y’abakazi baabo kubahweraho kusinga akaruuru.

N’ebya Omushaki weitu

KAMPALA

Sipiika wa Paramenti, Anita Annet Among narabura abany’ishengyero abashaija abarikunagaho abakazi baabo baheza kutunga obugaiga n’okutemba eidaara.

Ku abaire akuriire orushutamo rwa Paramenti nyomwebazyo ebiro 29.11.2024, Sipiika Among ashabire abashaija okuguma n’abakazi baabo n’obu bakuheeza kutemba eidaara bakatunga esente nyingi.

Among nakyoreka ngu abany’ishengyero abaingi abashaija nibaruga omu byaro byabo bwanyima y’abakazi baabo kubahweraho kusinga akaruuru. 

Nayongyeraho ngu aba ku barikuheeza kuhika omu Paramenti batandika kumera amapapa n’okushweraguza abakazi abandi bahendeera basigireho abakazi baabo abababereireho bakabashagika kuza omu Paramenti babasiga nibabonabona.

Okushaba kwe nikwijaho bwanyima ya minisita w’ekikura ky’abantu, Peace Regis Mutuuzo kuhayo rupoota y’omwaka ogu eya 2024 ekwatiriine n’ebiro 16 eby’okurwanisa emihondano erikukorwa aha bakazi n’abaishiki.

#WestUpdates