Purezidenti Museveni n'omukazi we Janet, arikwakiira abajwekyerwa kuruga omu gavumenti ya Egypt aha faamu ye eya Kisozi omuri Gomba. PPU Photos.

N’ebya Beth Akatukunda

GOMBA

Purezidenti Yoweri Kaguta Museveni nashaba amakorero okwongyera kukora omubazi gw’okurwanisa endwara y’ejwa eya Foot and Mouth Disease (FMD) kubaada kurwanisa endwara y’ejwa omu matungo.

“Mushemeriire kukora omubazi mwingi ahabw’okuba Uganda eine amatungo mingi. Uganda eine amatungo garikurenga miriyooni 44,” Purezidenti Museveni ashabire gavumenti ya Egypt.

Purezidenti obaire ashendekyereziibwe omukazi we kandi minisita w’eby’obwegyese n’emizaano, Janet Kataaha Museveni agambire ebi nyomwebazyo obwabaire nabuganaho guruupu y’abajwekyerwa kuruga omu gavumenti ya Egypt aha faamu ye eya Kisozi omu disiturikiti eya Gomba.

Purezidenti Museveni n'omukazi we Janet, barikurambuza abajwekyerwa kuruga omu gavumenti ya Egypt faamu ye eya Kisozi omuri Gomba aha Sande ebiro 26.05.2024..

Naagira ngu oihireho ente ezirikuhika miriyooni 16, hariho embuzi, empunu, n’agandi matungo agarikutuura omu bantu kandi goona nigareetera omubaro gw’amatungo omu Uganda gahika miriyooni 44. Purezidenti naagira ngu amatungo aga goona nigetengwa kusirikwa endwara y’ejwa.

Purezidenti Museveni nabwo ayakiire enkwatanisa ahagati ya gavumenti ya Egypt n’eya Uganda kurabira omu kitongore ekya NARO arikugira ngu baheza kukwatanisa, nikiija kubahweraho aha kucondooza n’okureeba ngu harugamu ebijuma birungi omu kucondooza kwabo.

Purezidenti Museveni n'omukazi we Janet, bari aha faamu yaabo eya Kisozi omu disiturikiti eya Gomba n'abagyenyi baabo kuruga omu eihanga erya Gomba aha Sande ebiro 26.05.2024.

Gavumenti ya Egypt ehaire Uganda doozi zirikuhika miriyooni 10 z’omubazi gw’endwara y’ejwa aha kabeeyi kakye ka Dollar 0.9.

Ekicweka ky’okubanza ky’omubazi ogu gwaheerize kuhika omu Uganda, za doozi miriyooni 3 z’omubazi ogundi nizeija kureetwa omu Uganda omu bwire bwa wiiki 3. 

Ebi byatwirwe minisita w’eby’obuhingi n’oburiisa Frank Tumwebaze.

Tumwebaze akyorekire ngu omubazi gw’okurwanisa endwara y’ejwa ogurugire Egypt nigwo gurikikirizeyo kuba mwingi ogu Uganda yaheerize kutunga.

Nabwo akyorekire ngu gavumenti neija kukwatanisa n’ekitongore ekya NARO kureeba ngu bayombeka fakitore omu Uganda kandi batendeka n’abanya-Uganda aha kikwatiriine n’enkoresa y’omubazi ogu.

Orukiiko oru nabwo rwetabirwemu Rtd. Lt.Col. Bright Rwamirama- Minisita w’eihanga ow’eby’amatungo, Maj. Gen. David Kyomukama Kasura- omuhandiiki w’entuura omu minisiture y’eby’obuhingi n’oburiisa, Lt. Gen. Sam Okiding- omuhwezi wa mukuru w’amahe ga UPDF n’abandi.

#WestUpdates