Okurugiirira ahari Kakyebezi, Mbarara City n’eya 24 omu kugira abantu baingi abaine endwara y’akakooko ka sirimu omu eihanga ryoona.

N’ebya Ram Edwin

MBARARA

Uganda eriizooba yayegaita ahansi yoona okwijuka ekiro ky’okurwanisa endwara y’akakooko ka sirimu, emwe ahandwara ekirizeyo kuteganisa amahanga agarikutunguuka omuri na Uganda.

Emikoro y’eihanga yakorerwa aha kishaayi kya Kibaale omu disiturikiti eya Rakai kandi Purezidenti Yoweri Kaguta Museveni niwe yaaba ari omugyenyi mukuru.

Purezidenti Yoweri Museveni obaire ari omugyenyi mukuru aha mikoro y'okwijuka ekiro ky'akakooko ka sirimu ekoriirwe aha kishaayi kya Kibaale omu disiturikiti eya Rakai. Photo by Eddie Ssejjoba.

Aha omuri Mbarara, omukoro omukuru gwakorerwa aha kishaayi kya Nyamityobora kandi guteebekanisiibwe ab’ekitongore ekya Reach A Hand Uganda bakwataniise na TV West, Radio West n’ebindi bitongore.

Abeebembezi ba Mbarara City, ab'ekitongore ekya Reach A Hand Uganda n'abandi barikutambura omu tauni ya Mbarara kumanyisa abantu ahandwara y'akakooko ka sirimu.

Aha mukoro ogu, eminyeeto yahigwa okutwara amagara gaabo nk’ekintu kikuru ekirabahwere omu kurwanisa endwara y’’akakooko ka sirimu erikweyongyera kujanjaara omu kyanga ekya Burengyerwa-Izooba bw’eihanga.

Omukoro gw’okumanyisa abanya Mbarara okwerinda n’okurwanisa akakooko ka sirimu gwatandika n’okutambura omu tauni ya Mbarara kandi gwahenderera aha kishaayi kya Nyamityobora.

Muheereza Valentine (Kachaina) n'abaserukare ba UPDF nabo bahikire aha mukoro gw'okwijuka ekiro ky'akakooko ka sirimu aha kishaayi kya Nyamityobora omuri Mbarara.

Abantu abahika aha mukoro ogu batunga omugisha gw’okukyeberwa endwara zitari zimwe nk’okukyebera akakooko ka sirimu, okukyebera amaisho, ekookoro y’omunwa gwa nyin’enda, okugaba eshagama n’ebundi buheereza ahabwa busha. 

Eki kyaba kigyendereire kuhwera abantu kumanya amagara gaabo okugemereire kandi abaaba barwaire bateebwa aha mibazi.

Omuhwezi wa RCC wa Mbarara City North, Robert Kanusu yayoreka okwerarikirira ahabw’eminyeeto eri ahagati y’emyaka 15-24 kweyongyera kukwatwa akakooko ka sirimu okurugiirira aha kucondooza okukozirwe aba Uganda AIDS Commission.

Abantu abahikire aha mukoro gw'okwijuka ekiro ky'akakooko ka sirimu aha kishaayi kya Nyamityobora omuri Mbarara Orwakataano ebiro 01/12/2023.

Meeya wa Mbarara, Robert Kakyebezi yaagira ngu ekikanyise endwara y’akakooko ka sirimu omu baishiki bato n’ahabw’okukunda ebintu by’ensi egi hamwe n’obutafaayo kwerinda.

Okurugiirira ahari Kakyebezi, Mbarara City n’eya 24 omu kugira abantu baingi abaine endwara y’akakooko ka sirimu omu eihanga ryoona.

Omushaho arikushomesa abantu okubaine kwerinda endwara y'akakooko ka sirimu barikukoresa za kondomu. Aba babaire bari aha mukoro gw'okwijuka ekiro ky'akakooko ka sirimu aha kishaayi kya Nyamityobora omu rurembo orwa Mbarara Orwakataano.

Yakyoreka ngu omwaka ogu ogwa 2023, Mbarara City ebaasize kufeerwa abantu 31 abarikwitwa endwara y’akakooko ka sirimu.

#WestUpdates