Abeesharingi aha disiturikiti ya Kitagwenda barikugaaniiraho na mukuru w'entebe ya 5, Ismail Mushemeza. PHOTO: Timothy Mushabe

Timothy Mushabe
Abatuura kuruga omubyaro 4 eby’omuruka ogwa Kinyamugara omuri Kiceece omu disiturikiti ya Kitagwenda bateireho akeesharingo batambura orugyendo rurikwinga oburaingwa bwa mayilo zirikurenga 20 kuza aha kitebe kikuru kya disturikiti yaabo.

Aba batambwire barikworeka obuhinzya-mutima n’ekyapa ky’eishomero erya Rwandagano eribakugamba ngu abajwekyerwa omu ishengyero bakariryangatanisa hamwe n’ebyapa birikushaba obuheereza bw’amaizi, enguuto, hamwe n’eirwariro.

Ab'eby'okwerinda barikuta abeesharingi omubuteeka omuri Kitagwenda enshumi nkye ehwaire. PHOTO: Timothy Mushabe

Okurugirira ahari Josephine Turihahabwe, kansara w’abakyara ahabw’egomborora ya Kicece, ahabw’ekizibu ky’eibura ry’eirwariro n’enguuto abakazi baingi nibafa barikuzaara obwo barikugyezaho kubashuumya orushozi ahi barikutura kandi barikukozesa obubugo.

Nayongyera agira ngu ekicweka eki, n’abahingi b’omutano barikwejumba omumwani hamwe n’entookye baitu ahabw’okubura emihanda, emishuuburo yaabo ehendera ebafeereire busha.

Bamwe ahabeesharingi barikutambura kuza ahakitebe kikuru kya disiturikiti ya Kitagwenda nyomwebazyo ebiro 06.06.2024. PHOTO: Timothy Mushabe

Omubandi beesharingi abutugaaniireho nabo abarimu Alice Bakera, Hellen Kyomuhangi, Mark Mpetwa boona bahaireyo okwetomboitwa nikwo kumwe kw’amaizi, eishomero, eirwariro hamwe n’enguuto.

Bwanyima y’okuhika aha disturikiti, aba baakiirwe mukuru w’entebe ya 5 Ismail Mushemeza, omujwekyerwa wa Purezidenti omu disiturikiti, Nickolas Kamukama, bashagateirwe eby’okwerinda by’amaani.

Mushemeza arikugamba n’abantu aba hoona ayorekire amatsiko makye ahakutunga eirwariro, eishomero hamwe n’amaizi marungi.

Bamwe ahabeesharingi barinzire eki abeebembezi baraabagarukyemu omukwetomboitira obuheereza ahakitebe kikuru kya disiturikiti ya Kitagwenda nyomwebazyo ebiro 06.06.2024. PHOTO: Timothy Mushabe

Ayongyeire yaashoboorora ngu, yo, enguuto eyi barikwenda yaaherize kuteebwa omunkora omumwaka gw'eby’esente ogurikuza kutandika kandi neija kumaraho miriyooni 300.

Beitu naagira ngu, enguuto egi yaaba yaakozirwe obundi kibaasa kureetaho amatsiko g’okwombeka eirwariro hamwe n’eishomero nainga kuhweraho abatuura kukozesa enguuto kuza kutunga obuheereza ahandi.

Abeesharingi, ebi tibibashemeize kandi abaingi basigaire barikuhaya kuhindura abeebembezi  ahakaruru aka 2026 na munonga ahabajwekyerwa baabo omu ishengero ry’eihanga.

#WestUpdates
#RadioWestAt25