Abarikujunaanwa barimu; Orikukurira puroguraamu ya PDM omuri Maska, John Baptist Matovu, 53 hamwe n’ab’emiruka 2 abarimu; Rogers Mutebi, 31 na Joseph Bbaale,36. Photo by Dismus Buregyeya.

N’ebya Dismus Buregyeya

MASAKA

Orikukurira puroguraamu y’entunguuka y’emiruka eya PDM ahabwa disiturikiti eya Masaka n’emiruka 2 basindiikirwe aharumanda omu kihome kya Masaka ahabw’okugambwa kuba baibire esente za PDM n’obutafayo ahamurimo gwabo.

Kooti ya Masaka eyangire okushaba kw’abashatu aba kwemererwa ahabwa puriida waabo, Ronald Jamwa ou babaire baretsire kuremwa kworeka layisensi ye y’okworeka ngu ni puriida kandi abeema baabo bahaireyo ebaruha za ceeyamaani LCI zitariho ebiro n’ekigyendererwa.

Abarikujunaanwa barimu; Orikukurira puroguraamu ya PDM omuri Maska, John Baptist Matovu, 53 hamwe n’ab’emiruka 2 abarimu; Rogers Mutebi, 31 na Joseph Bbaale,36.

Kooti ebaire ekuriirwe omuhwezi w’omuramuzi wa kooti ya Masaka, Jeshua Twongyeleirwe nyomwebazyo ebiro 09.12.2024 eyangire okushaba kw’abashatu aba okw’okwemererwa.

Omu kushaba kwabo kw’okwemererwa, abarikujunaanwa nibenda kooti okubaikiriza bakemererwa barikugira ngu bamazire ebiro 18 omu kihome, obwire obureteire amaka gaabo okubonabona.

Abashatu aba bakakwatwa ekitongore ekirikurwanisa obushomankuzi ekya State House Anti-Corruption Unit omu muhigo ogukwateirwemu n’omuhwezi wa RDC wa Masaka, Sarah Nakyanzi, Orikukurira enshonga z’amaka n’abaana omuri Masaka, Francis Kizza hamwe n’orikukurira eby’obwegyese omu rurembo orwa, John Kakeeto ahabw’okugambwa kuba bayejumbire omukurya enguzi n’okukoresa kubi ofiisi zaabo.

Kooti ehurire ngu Mutebi owabaire nakora nk’ow’omuruka gwa Kibanda omugomborora eya Bukakata omuri Masaka najunaanwa omushango gw’okwiba shiringi 50,000 kuruga ahari Moses Ssekabira ahansi ya puroguraamu ya PDM.

Abahababi nibagira ngu Joseph Bbaale nabwo ow’omuruka gwa Bukibonga omugomborora eya Bukakata akiiba shiringi 950,000 kuruga Geofrey Mukasa ahansi ya puroguraamu ya PDM omu kwezi kwa 12, 2023.

Orikukurira puroguraamu egi JB Matovu ateirweho omushango gw’obutafayo ahamurimo gw’okureebuuza puroguraamu ya PDM ahagati y’omwaka gwa 2022 na 2024.

#WestUpdates