Bamwe omubeegi ba St. Hellens Primary School bari omumpaka z'okweshongora n'okuzaana emizaano ahari Mbarara Catholic Social Centre Orwamukaaga ebiro 10.08.2024. PHOTO: Eli Akiza

Eli Akiza omuri Mbarara City
Amashomero 5 ag’ekyanga kya Ankore nigo gatoorainwe kujwekyera ekyanga eki omu mpaka z'eihanga eza National Music Dance and Drama Festival omu disiturikiti ya Mbale.

Empaka z'okusherura amashomero agarajwekyere Nkore ah'eihanga zibeireho aharwamukaaga ebiro 10.08.2024 ahari Mbarara Catholic Social Centre omururembo Mbarara.

Abeegi ba Kibubura Integrated kuruga omu disiturikiti y'Ibanda bari omumpaka z'okweshongora n'okuzaana emizaano ahari Mbarara Catholic Social Centre omururembo Mbarara ebiro 10.08.2024. PHOTO: Eli Akiza

Buri mwaka, Gavumenti, kurabira omu kitongore ky’eby'obwegyese neetebeekanisa empaka z’ebyeshongoro n’emizaano (Music Dance and Drama) kuhwera abeegi okutunguura entaranta zaabo hamwe n’okujanjaaza omuranga gw’eby’obwegyese omu ihanga.

Omwaka ogu empaka ezi zitebeekanisiibwe ahansi y'omutwe gw'okurinda ebyobuhangwa omu mashomero (Environmental Conservation in Schools) okuhandiikisa abaana abarikuzaarwa (Birth Registration) hamwe n'obuyonjo bw'omukanwa (Oral Health).

Bamwe omubeegi ba Mbarara Junior School bari omukuhayanira omwanya gw'oraajwekyere ekyanga kya Nkore ah'ihanga omumpaka z'okweshongora n'okuzaana emizaano ahari Mbarara Catholic Social Centre ebiro 10.08.2024. PHOTO: Eli Akiza

Ekyanga kya Ankore kitooraine amashomero agarakijwekyere omuz'eihanga kandi eishomero rya Mbarara Junior School niryo risingire agandi n'obubonero 1,391, Ibanda harugireyo erya Kibubura Intergrated eribeire erya 2 n'obubonero 1,268. Mbarara Municipal School egiire omugwa 3 n'obubonero 1,262. St. Hellens egiire omugwa 4 n’obubonero 1,237 kandi bo aba Gayaza Primary School kuruga Isingiro babaire aba 5 n’obubonero 1,060.

Agandi ageejumbire omumpaka ezi harimu Kyengando Primary School kuruga Kazo, Mwamba Junior School kuruga Ibanda hamwe St. Pauls Rubindi kuruga omu disiturikiti ya Mbarara.

Empaka z'eihanga ez'omwaka ogu niziija kutandika aha biro 24.08.2024 omu rurembo rwa Mbale kandi abarabireho okwetooroora eihanga ryona obwa hati bari omu kwetebeekanisa.

West Updates