Ceeyamaani wa kooti y’ekinyamahe, Brig. Gen. Robert Freeman Mugabe. Photo by Douglas Mubiru.

N’ebya Douglas Mubiru

Abantu 32 b’enzaarwa za Kenya bajuriize ekifubiro ky’okukomwa emyaka 20 omu kooti y’ekinyamahe omuri Makindye, Kampala.

Guruupu y’abanya-Kenya bakaheebwa ekifubiro eku omu kooti y’ekinyamahe omuri Moroto bwanyima y’okusingisibwa omushango gw’okushangwa n’embundu hamwe n’amasasi.

Okurugiirira aha kiragiro, omuntu okusingisiibwa omushango gw’okushangwa n’embundu omu buhenda biragiro, ekifubiro ekirikukiraho kumuheebwa k’okukomwa emyaka 10.

Abajuriize omushango ogu barimu; Erot Eusugu, Akol Akiru, Lowoton Iwar, Namuya Ebariat, Lokwang Lonrinyang, Meriokeol Erukudi I, Lokia Akiru Esekoni, Ekaru Lorot, Namode Eroo, Loitakol L. Kiyonga na Atukon Ewoi. 

Abandi ni; Lore Ekutan, Etabo M. Epuri, Emuria Losuban, Loyenai Lomuria, Apuli Namuya, Akule Ekawoton, Moru Ichowa, Eedung Ekipetite, Apa Ngorok Logorion, Lokolitieng, Lomeriana Lojorei n’abandi baingi.

Aba babaire bajwekiirwe Darius Taremwa, nawe oyeshoboriireho omu maisho ga ceeyamaani wa kooti y’ekinyamahe, Brig. Gen. Robert Freeman Mugabe, nka Puriida wa kooti enkuru omuri Kenya kandi nabwo orikukora na kampuni y’abanyabiragiro eya Asingwire & Kakuru Advocates omu Uganda.

Omu kujuriza kwabo, aba nibajunana kooti y’ekinyamahe omuri Moroto eyabahaire ekifubiro ahabw’obutamanya kiragiro ahi yahendiire ebahaire ekifubiro ky’okukomwa emyaka 20 aha mwanya gw’emyaka 10 erikuragiirwa omuntu yaaheza kusingwa omushango ogu..

Ceeyamaani wa kooti y’ekinyamahe omuri Makindye, Brig. Gen. Freeman Mugabe ayongiizeyo omushango ogu kuhisya ebiro 10/11/2023 obu orubaju oruhababi rurikwija kugarukamu ahakujuriza kw’abantu aba.

#WestUpdates