Butandu z’ahanguuto zisire abaana b’amashomero barikurenga 230 omu meezi 9- Pooriisi.

N’ebya Omushaki weitu

KAMPALA

Abaana b’amashomero barikuhika 239 nibo bafeereire omuri butandu z’ahanguuto omu bwire bw’ameezi 9, omwaka ogu.

Ebi n’ebigambirwe Omugambirizi wa Pooriisi y’eby’ahanguuto, Micheal Kananura obu abaire nagambaho n’abanyamakuru aharw’okubanza ebiro 16.09.2024.

Kananura arabwire abavugi b’ebiruka okuba abegyendesereza na munonga omu bwire obu abeegi bagarukire aha mashomero.

Abaana abari ahagati y’emyaka 5 na 18 nibo barikufeera omuri butandu ezi baaba nibabatwara n’okubaiha aha mashomero omu taamu 2 ezihwire, Okurugiirira ahari Kananura.

Nashaba abazaire, abashomesa n’abavugi b’ebiruka okugira obujunanizibwa bw’okureeba ngu abaana n’abeegi barinzirwe gye baaba nibaza ah’eishomero n’okurugayo.

Uganda nehandiika za butandu z’ahanguuto zirikurenga 20,000 omu eihanga ryoona buri mwaka. Abantu barikurenga 2,000 nibo barikufeera omuri butandu ezi, Okurugiirira ahari rupoota ya Pooriisi.

#WestUpdates