Mukuru w’ekitongore eky’ebigyezo ekya UNEB, Dan Odongo arikugambaho n'abanyamakuru aha Uganda Media Centre...(Photo by Mary Kansiime)

Ebigyezo bya S.4 byatandika n’okubangura abeegi okubarayetwaaze

N’ebya Nelson Kiva

Ebigyezo bya S.4 ebya UCE byatandika eriizooba n’okushomesa abeegi oku barayetwaaze baaba nibakora ebibuuzo ebi.

Arikugambaho n’abanyamakuru ahari Uganda Media Centre omuri Kampala akasheeshe aka, Mukuru w’ekitongore eky’ebigyezo ekya UNEB, Dan Odongo yaagira ngu abeegi barikurenga 360,000 bakehandiikisa kukora ebigyezo bya S.4 omwaka ogu.

Ebigyezo ebi nibyija kutandika omubutongore aharwokubanza, 16/10/2023 obwo barikutandika n’amashomo aga Geography Paper 1 na Geography Paper 2.

Omu kubangura abeegi, bakuru b’amashomero nibaba nibashomesa abeegi oku bashemereire kwetwaazamu baaba nibakora ebigyezo by’akamaririizo nk’obutakopa n’okwiba ebigyezo.

Kurugiirira ahari UNEB, abeegi ba S.4 nibaija kukorera ebigyezo omumyanya 3,863 omu eihanga ryona.

Odongo yaagira ahakihome ekya  Luzira Upper Prison, abatsibe 59 nibo bahandiikirwe, ouri aba, 7 n’abakazi kandi 52 n’abashaija.

#WestUpdates