John Kikonyogo omugambirizi wa Forum for Democratic Change. PHOTO: The New Vision

N’ebya Ivan Tsebeni
Ekibiina ky’eby’obutegyeki eky’orubaju oruhakani ekya Forum for Democratic Change nikyenda Gavumenti ku etaho ekiragiro eky’okushomesa eby’emyoga abeegi boona abatabaasize kutunga eidaara ryona omubigyezo ebihweire eby’ekyamushanju eby’omwaka oguhwaire 

Enkora egi nibagira ngu nebaasa kureetera abeegi baahwera eihanga n’obu baakuba bagwire ebigyezo. 

Omugambirizi w’ekibiina eki, John Kikonyogo, ahakugaaniiraho n’abanyamakuru (okwa nuri wiiki) akasheeshe k’eriizooba Orwokubanza 29.01.2024 ahakitebe kikuru ky’ekibiina omuri Najjanankumbi omururembo Kampala, yaagira ngu abeegi baingi nibakira kunagaijurwa babura kutunga omugisha gw’obwegyese bwanyima y’okugwa ebibuuzo bya PLE. 

Kikonyogo yaashoboorora ngu omunsi egi erikuhinduka bwakyeire-bwaizire, emyoga neyetaagisa okutamu amaani kukira n’amashomo ag’obwengye obwengye obw’omumutwe bwonka eki yaagira ngu Gavumenti eshemereire kukoraho aho n’aho. Ogu yaagira ngu abeegi abarikugwa ebigyezo bya PLE ni baingi munonga kandi ngu nibabaasa kukoresibwa kuhwera omukutunguura eihanga na munonga baaba bashomesiibwe emyoga mirungi.

“Tushemereire kushomesa abaana baitu kwonka okushomeserera ebya ofiisi ku kurayangye, hashemereire kuba hariho entebeekanisa endiijo enungi. Okushomesa emyoga abo abaremirwe ebya PLE nikubaasa kuha omuzizi gw’amaani emirimo y’eihanga,” Kikonyogo nikwo yaagira. 
Ogu yaayongyeraho ngu abazaire baaba batashomeise abaana baabo, bari omukabi k’okutaahirirwa ekikoosi ekyo ekitashomire, kandi ekirikuba kitaine mwanya omukatare k’emirimo.

Omubirugire omubigyezo by’ekyamushanju eby’omwaka oguhwaire ebishohoire enshumi nkye ehwaire, haihi kimwe-kya-kashatu ky’abeegi omu disiturikiti ya Kibuku, Madi Okollo, Dokolo, kween na Namisindwa tibarikubaasa kuza omumashomero aga siniya bwanyima y’okuburwa eidaara ahabw’okukora kubi ebigyezo. Amadisiturikiti agandi gaine abeegi barikurenzya obucweka 20 ahari 100 abari omu idaara eririkushembayo erya U.

Orikukruira ekitongore ekirikutebeekanisa n’okurira ebigyezo by’amashomero omu ihanga ekua Uganda National Examinations Board, Dan Odongo, akyorekire ngu eidaara erya U n’eryo eririkuheebwa abeegi abarikuremwa kukoragye kuhika n’ahamutindo ogw’ahansi ogu barikuba nibetaaga kuheeraho obubonero kandi aba tibarikubaasa kuza omukibiina ky’okubanza ekya siniya.

“Kishemereire kumanywa ngu omubaro gw’abeegi abari omu idaara erya U ni mwingi, ahari 88,269 (obucweka 10.4 ahari 100) kandi eki kishemereire kuba nikyerarikiriza kwenda ngu aba batongyerwa ahamubaro gw’abaana abarikuruga omu ishomero. Niheetaagisa okucondooza ekirikureeta eki hamwe n’ekyakubaasa kukorwa,” Odongo nikwo agizire agumize ngu hariho amadisiturikiti Nka Kibuku, Madi Okollo, Dokolo, Kween na Namisindwa ahi omubaro guri ah’iguru kukira n’orurengo rw’eihanga ryona.
Omwaka oguhwaire, omuhururu y’okugyezaho kwenegyeza eby’obwegyese eby’emyoga n’okutunguura omutindo gw’abanyamyoga omu ihanga ryona, Purezidenti Museveni akagamba emyanya 18 misya y’okushomesezamu emyoga. 

Nk’entandikwa y’okufa ahabeegi baingi munonga, emyanya egi egyendereire kutunguura obwegyese bw’eby’emikono hamwe n’okuteeraho eminyeto omuhanda kutunga omwanya omukatare k’emirimo. Eki kandi nabwo kikaba kigyendereire kuhwera abaaremirwe kuhika ebigyezo by’eihanga.

#WestUpdates