Acleo Byamukama- Mukuru w’ekigombe ky’abaashomiire ah’eishomero erya Kibona Vocational SS arikuhayo kompyuta aha beegi b'eishomero eri. Photos by Bruno Mugizi.

N’ebya Bruno Mugizi

BUSHENYI

Ekitongore ekitari kya gavumenti kuruga omu eihanga erya Polanda ekya Light for Africa Foundation kiheerizeyo za kompyuta 3 ah'eishomero erya Kibona Vocational SS eririkushangwa omu gomborora ya Kyabugimbi omu disiturikiti ya Bushenyi. 

Acleo Byamukama- Mukuru w’ekigombe ky’abaashomiire ah’eishomero erya Kibona Vocational SS arikukwasa abeegi b'eishomero eri za kompyuta.

Eishomero erya Kibona Vocational SS eryatandikirweho abazaire hamwe n’obureeberezi bwa West Ankole omu mwaka gwa 2002, gavumenti eheerize kuryegaruriza.

Arikuhayo kompyuta ezi aha mukoro ogubaire ah’eishomero eri nyomwebazyo ebiro 05/11/2023, Acleo Byamukama- Mukuru w’ekigombe ky’abaashomiire ah’eishomero eri kandi oretsire za kompyuta agizire ngu ekigyendererwa ky’okuhayo za kompyuta n’okwenda kwongyera amaani aha kushomesa abeegi ebya kanyabwengye.

Abeegi b'eishomero erya Kibona Vocational SS omuri Bushenyi barikwakiira kompyuta kuruga owa Acleo Byamukama- Mukuru w’ekigombe ky’abaashomiire ah’eishomero eri.

Byamukama ashabire abeegi okukoresa gye za kompyuta ezi kubaasa kubabeera ez’omugasho.

Aha mukoro nigwo gumwe, mukuru w’eishomero eri, Albert Musinguzi, asiimire gavumenti ahabw'okutwara eishomero eri.

Musinguzi agizire ngu behireyo kureeba ngu bayongyera amaani aha kutunguura omutindo gw’eby’obwegyese n’okubangura abeegi omu myooga etari emwe.

#WestUpdates