Aakibiishopu w'ekereziya omuri Nairobi, Philip Anyolo naagira ngu esente ezi nibeija kuzigaruzayo kandi bangire n'obuhwezi obundi kuruga owa Purezidenti. Courtesy Photo.

N’ebya Omushaki weitu

KENYA

Ekereziya omu eihanga erya Kenya eyangire obuhwezi bw’esente za $40,000 obuhirweyo Purezidenti wa Kenya, William Ruto.

Purezidenti Ruto abaire ahaireyo esente ezi kubaasa kwombeka enju y’omufaaza hamwe n’ekirabo ky’okusiima abeeshongozi b’omu kwaya ya Sande ebaire aha kereziya ya Soweto omu rurembo orwa Nairobi.

Obuhwezi obu nibwijaho bwanyima yaaba Biishopu b’ekereziya kushohoza ekihandiiko ekibaire nikijumirira gavumenti ahabw’okuremwa kuhikiriza ebibarikuraganisa omu bwire bw’akaruuru.

Amaramizo agarimu n’ekereziya gaizire nigajumirirwa eminyeto eyayesharingire omuri Kenya erikuhakanisa eky’okwongyera omushoro omu eihanga eryo.

Eminyeto ekajunaana amaramizo ahabw’okwehisya munonga abanyabutegyeki.

Aakibiishopu w’ekereziya omuri Nairobi, Philip Anyolo naagira ngu esente ezi nibeija kuzigaruzayo kandi nibenda ekereziya erindwegye kureeba ngu tiyakoresibwa abanyabutegyeki na munonga omu bwire bw’akaruuru abarikuba nibeerondera ebyabo nk’abantu.

#WestUpdates