Gachagua, 59, naagira ngu abakumi be babamwihireho kandi n’abakozi be boona baboheereza omu kahuumuro. PHOTO by AFP

N’ebya AFP

NAIROBI- Omuhwezi wa Purezidenti wa Kenya oherize kwihwamu obwesigye, Rigathi Gachagua aha Sande ebiro 20.10.2024 akabukire mukama we, Purezidenti William Ruto ngu agyendereire kumusisira arikwongyeraho ngu amagara ge gabaasa kuba gari omu kabi.

Aharwakana, Gachagua akihwamu obwesigye orukiiko orukuru orwa Paramenti ya Kenya ahabw’emishango 5 ahari 11 erikumujunaanwa beitu kooti eyemereize entebeekanisa ez’okutaho oramuze omu bigyere.

Gachagua, 59, naagira ngu abakumi be babamwihireho kandi n’abakozi be boona baboheereza omu kahuumuro.

Agambire ebi bwanyima y’okusiburwa kuruga omu eirwariro erya Karen Hospital omuri Nairobi ahi abaire atwirwe kuragurirwa obusaasi bw’omu kifuba.

Gachagua akatandika kushaasha omu eihangwe gw’orwakana, harikuburayo eshaaha nkye akaza kwetongozaho omu maisho g’orukiiko orukuru orwa Paramenti ya Kenya (Senate).

Orukiiko orukuru orwa Paramenti ya Kenya ruteire akaruuru k’okumwiha omu ofiisi bwanyima y’okushaba kwaba Puriida be okw’okwongyezayo okwetonganaho kwe kubura kurabamu.

Gachagua najunaanwa emishango erimu obushomankuzi, okubaganisamu abantu omu by’obutegyeki arikwema aha nganda, okutiniisiriza abaramuzi n’endiijo.

Aho naaho, Ruto atooraniireho minisita w’enshonga z’omunda, Kithure Kindiki kuza omu bigyere bya Rigathi Gachagua.

Beitu, kooti enkuru omuri Nairobi eyemereize entebeekanisa ez’okutoorana omuhwezi wa Purezidenti omusya, edakiika nkye, Paramenti yaheza kuteera akaruuru k’okushagika okutooranwa kwa Kindiki, 52, nk’omuhwezi wa Purezidenti wa Kenya omusya.

Abaramuzi ba kooti bashatu nibeija kushutama kuhurira omushango ogu nyencakare Orwakabiri ebiro 21.10.2024.

Purezidenti William Ruto tihaine kiyagambire ahanshonga zoona ez’okwihamu Rigathi Gachagua.

#WestUpdates