COURTESY PHOTO

N’ebya Michael Odeng

Kooti y’eby’obushuubuzi yaaragiira ekitongore ky’eby’empurizigana ekya MTN Uganda n’ekitongore ekirikukurira omupiira gw’ebigyere omu ihanga ekya Federation of Uganda Football Association ahabw’okuhenda ebiragiro by’endagaano eri ahabishushani by’emizaano eya tiimu y’omupiira ento eya Proline Soccer Academy. Omuramuzi wa kooti enkuru, Stephen Mubiru, yaacwamu ngu FUFA ekaha MTN obugabe omubuhenda-biragiro kukoresa ebishushani ebi Proline Soccer Academy eineho obushoboorozi kubikoresa kumara emyaka 5.

 
“Kitabaaza yaahamya ku kitabaarizibwa yaahenzire ebiragiro by’okukoresa ebishushani ebi baineho obushoboorozi eby’abazaani 11,” Mubiru nikwo yaacwa omushango. 
Omuramuzi yaaragiira ngu shiringi miriyooni 570.6 niziija kuzamu amagoba g’obucweka 6 ahari 100 buri mwaka kutandika n’ekiro eki baatabaarize (ebiro 06.09.2011) kuhisya obu ziraashashurwe zikahwayo. 
Kooti yaahurira ngu MTN ekata sente omukibiina kya FUFA ahagati y’omwaka 2007 na 2013. 

Beitu hoona, kumara obwire obu MTN yaabeire neeta sente omuri FUFA, FUFA ekaha ekitongore ky’eby’empurizigana eki, obushoboorozi bw’okukoresa ebishushani ebyabeire biri ebya Proline omubiragiro kandi obwo endagaano ahagati ya FUFA na Proline ekaba ehweireho ebiro 08.09.2008. 

Ekyo kyareetera kooti kucwamu ngu MTN, kumara emyaka 5, ekahenda ebiragiro by’ebishushani, erikukoresa ebishushani ebyo kandi hoona omubiragiro ebyabeire biri ebya Proline. 

“Ba kitabaarizibwa bakaba baine kushashura kitabaaza omuhendo gwa sente ogwabeire guramuziibweho omundagaano eyaabeire ehweireho kuri noogira ngu endagaano egyo ekaikirizibwa kwongyezibwayo kukoresa ebishushani omukukora sente kumara obwire obwo,” Mubiru nikwo yaagira.

Omuncwamu ey’ebiro 02.02.2024, ouramuzi akagira ngu endagaano terikuha bugabe bwona ahabantu 9 abaabeire bateire omukono ahandagaano, kukoresa ebishushani ebi barikubisherurira akatare buri omwe ninga nk’abeeteeraine.  

#WestUpdates