Endwara y’okutukura amaisho enjanjiire omuri Kampala,

N’ebya Charles Etukuri

KAMPALA

Ekitongore ekya Kampala Capital City Authority (KCCA) nikishaba abantu okutaho emiringo nk’okunaba omungaro buri kaire kubaasa kwerinda okukwatwa endwara y’okutukura amaisho bwanyima y’endwara egi kubarukaho omu mashomero agamwe omuri Kampala.

Omu baruha y’ebiro 13/03/2024, eyoheereziibwe bakuru b’amashomero boona aba gavumenti n’ag’abantu buntu, Charles Bonnie Maginot, naagira ngu baheerize kumanyisaho minisiture y’eby’amagara ahakubarukaho kw’endwara y’okutukura amaisho omuri Kampala.

Amashomero goona nigashabwa kuhayo omuntu weena ou barareebe aine obubonero bw’endwara y’okutukura amaisho nainga okuteerera KCCA aha namba etari y’okushashurirwa eya 0800299000.

Dr. Abel Kafeero nakyoreka ngu endwara y’okutukura amaisho nereetwa obukooko.

Naagira ngu endwara egi nerahuka kujanjaara kandi nekira kukwara abaana abarikwija bakagituriza abantu abakuru.

Nakyoreka ngu okuragurira endwara egi nikiba nikirugirira aha kigiretsire n’obwire obu endwara egi erikuba emazire aha muntu.

Narabura ngu endwara egi yaaba etaraguriirwe omu bwire, nebaasa kureetera omuntu yahuma amaisho. 

Dr. Kafeero nashaba abantu okwerinda okubyama omu bitanda bimwe n’omuntu orikuba aine endwara egi.

Omu kwezi kwa 2, 2024, Rwanda, Kenya na Tanzania nago gakarangiirira okubarukaho kw’endwara y’okutukura amaisho.

#WestUpdates