MP wa Buhweju, Francis Mwijukye, arikworeka oku ahutaaziibwe ahamutwe omukutaahirira kw'omumihondano y'eitaka aha Sande. PHOTO: Courtesy

Bruno Mugizi, Buhweju.

Omujwekyerwa omu ishengyero ahabw’ishaza erya Buhweju, Francis Mwijukye, obwa hati ariyo naajanjaba obuhuta obu atungyeire omumihondano y’eitaka.

Eki kibaireho nyomwebazyo aha Sande ebiro 12.05.2024 omukyaro kya Rwanyambaare, omugomborora ya Nyakishana omu disiturikiti ya Buhweju obu Hon. Mwijukye abeire nagambaho n’abaikiriza abarikushabira ahakelezia ya Rwanyambaare kandi hoona ababeire nibetomboitira Kamugisha Frank ahabw’okunyaga eitaka ryabo.

Okurugiirira ahari Deo Atuhaire, ceyamaani w’entebe ya 5 ahabwa disiturikiti ya Buhweju, Mwijukye ataahiriirwe ekikoosi ky’abanyagi b’eitaka bakwatsire emihoro, enkoni n’amabaare ahi ateirwe amabaare agamurekireho obuhuta bw’amaani ahamutwe.

“Poorisi emucungwire kandi obwa hati ari ah’irwariro omururembo Mbarara. Abashagiki ba MP nibashabwa kuguma n’obuteeka obwo poorisi poorisi erikugumizamu n’okutooza abambuzi aba,” nikwo Deo ahandiikire ahakikoosi kimwe ky’omukura ogwa intaneeti, ogwa WhatsApp.

Abandi 7 bahutaire!

Omukutaahirira oku, abantu abandi 7, oteiremu n’omunyamakuru wa Vision Group orikukorera TV West, Juliet Kyarisiima, nabo bahutaaziibwe.

Juliet Kyarisiima, omushaki w'amakuru #Agacencwire ahabwa TV West omuri Buhweju, nawe ahutaarire omukutaahirira oku. PHOTO: Courtesy.

Juliet agambeire TV West ngu esimu n’ebindi byoma bye ebi arikukoresa kushaka Agacencwire ebirimu ‘camera’ na kanyabwengye byona bicwekyereziibwe.

Ahi tutungyeire amakuru aga, poorisi tihaine eki ebaire yaagambire ahamuhondano ogu.

#WestUpdates